ପୁରୀ ଅଫିସ, ୧୦।୬: ଆସନ୍ତା ୨୩ ତାରିଖରେ ରଥଯାତ୍ରା। କିନ୍ତୁ ଏ ନେଇ ବର୍ତ୍ତମାନ ପର୍ଯ୍ୟନ୍ତ କିଛି ସ୍ପଷ୍ଟ କରାଯାଇ ନାହିଁ। ରଥଯାତ୍ରା ଆୟୋଜନକୁ ନେଇ ସମସ୍ତେ ଏବେ ଦ୍ୱନ୍ଦ୍ୱରେ ରହିଛନ୍ତି। ରଥଯାତ୍ରାକୁ ନେଇ ଆଶା ଆଶଙ୍କା ଲାଗି ରହିଛି। ସରକାର ଓ ଶ୍ରୀମନ୍ଦିର ପ୍ରଶାସନ ଏହି ଆଶଙ୍କାକୁ ଦୂର କରନ୍ତୁ ବୋଲି ଦଇତାପତି ନିଯୋଗ ମୁଖପାତ୍ର ଗଣପତି ଦାସମହାପାତ୍ର କହିଛନ୍ତି। ବୁଧବାର ଆୟୋଜିତ ଏକ ଖବରଦାତା ସମ୍ମିଳନିରେ ଗଣପତି କହିଛନ୍ତି, ରଥଯାତ୍ରା ସଂକ୍ରାନ୍ତରେ ଶ୍ରୀମନ୍ଦିର ପ୍ରଶାସନ ପକ୍ଷରୁ ତଥ୍ୟ ଦିଆଯାଉ। ଛତିଶା ନିଯୋଗ ବୈଠକ ଡାକି ନୀତି ନିର୍ଘଣ୍ଟ ସ୍ଥିର ହେଉ। ନୀତି ନିର୍ଘଣ୍ଟ ପ୍ରକାଶ ହେଲେ ଭକ୍ତଙ୍କ ମଧ୍ୟରେ ଯେଉଁ ଆଶଙ୍କା ରହିଛି ତାହା ଦୂର ହେବ। ସରକାର ଏହାକୁ ଗୁରୁତର ସହ ନେଇ ରଥଯାତ୍ରା ଆୟୋଜନକୁ ନେଇ ଥିବା ସଂସୟକୁ ଦୂର କରନ୍ତୁ ବୋଲି ଗଣପତି ଦାବି ରଖିଛନ୍ତି।
