ନୂଆଦିଲ୍ଲୀ,୧୩ା୬(ପି.ଟି.)-ଚଳିତବର୍ଷର ଦ୍ରୋଣାଚାର୍ଯ୍ୟ ପୁରସ୍କାର ପାଇଁ ପୂର୍ବତନ ଜାତୀୟ ବକ୍ସିଂ କୋଚ୍ ଗୁର୍ବକ୍ସ ସିଂ ସାନ୍ଧୁ ଦୁଇଥର ରାଜ୍ୟଗୋଷ୍ଠୀ କ୍ରୀଡ଼ା ପଦକ ବିଜେତା ମନୋଜ କୁମାରଙ୍କ ବ୍ୟକ୍ତିଗତ କୋଚ୍ ତଥା ବଡ଼ ଭାଇ ରାଜେଶ କୁମାର ରାଜୋଣ୍ଡଙ୍କ ନାମ ସୁପାରିସ କରିଛନ୍ତି। ଜଣେ ପୂର୍ବତନ ପୁରସ୍କାର ବିଜେତା ହିସାବରେ ସାନ୍ଧୁ ଜାତୀୟ କ୍ରୀଡ଼ା ପୁରସ୍କାର ପାଇଁ ନାମ ସୁପାରିସ କରିପାରିବେ। ୩୭ ବର୍ଷୀୟ ରାଜୋଣ୍ଡ ଇଣ୍ଟରନ୍ୟାଶନାଲ ବକ୍ସିଂ ଆସୋସିଏଶନ (ଏଆଇବିଏ)ର ଜଣେ ଟୁ-ଷ୍ଟାର କୋଚ୍। ଅଲିମ୍ପିଆନ ଓ ଅର୍ଜୁନ ପୁରସ୍କାର ବିଜେତା ମନୋଜଙ୍କ କ୍ୟାରିୟର ଗଢ଼ିିବାରେ ତାଙ୍କର ବିଶେଷ ଭୂମିକା ରହିଛି। ରାଜୋଣ୍ଡ୍ ବର୍ତ୍ତମାନ କୁରୁକ୍ଷେତ୍ର ୟୁନିଭର୍ସିଟିରେ କାର୍ଯ୍ୟରତ। ଖେଲୋ ଇଣ୍ଡିଆ ୟୁନିଭର୍ସିଟି ଗେମ୍ସ ବକ୍ସିଂ ପ୍ରତିଯୋଗିତାରେ ତାଙ୍କ ୟୁନିଭର୍ସିଟିକୁ ଶୀର୍ଷରେ ପହଞ୍ଚାଇବାରେ ତାଙ୍କର ବିଶେଷ ଭୂମିକା ରହିଛି। କ୍ରୀଡ଼ାମନ୍ତ୍ରୀ କିରେନ ରିଜିଜୁଙ୍କ ନିକଟକୁ ପଠାଇଥିବା ଏକ ଚିଠିରେ ସାନ୍ଧୁ ଉଲ୍ଲେଖ କରିଛନ୍ତି ଯେ, ଜଣେ ବକ୍ସିଂ କୋଚ୍ ହିସାବରେ ରାଜେଶ କୁମାରଙ୍କ ସଫଳତାକୁ ହୃଦୟଙ୍ଗମ କରିପାରିଛି। ବକ୍ସିଂ କୋଚ୍ କାଟେଗୋରିରେ ସମ୍ମାନଜନକ ଦ୍ରୋଣାଚାର୍ଯ୍ୟ ପୁରସ୍କାର ପାଇଁ ତାଙ୍କର ଯଥେଷ୍ଟ ଯୋଗ୍ୟତା ରହିଛି। ଅନ୍ୟପକ୍ଷରେ ଜଣେ ପୂର୍ବତନ ଏସିଆନ ଚାମ୍ପିୟନଶିପ୍ ପଦକ ବିଜେତା ମନୋଜ କହିଛନ୍ତି ତାଙ୍କ ଭାଇ ଜାତୀୟ ସ୍ବୀକୃତି ପାଇବା ଲାଗି ହକ୍ଦାର ଅଟନ୍ତି। ତାଙ୍କ ଯୋଗୁ ହିଁ ମୁଁ ବକ୍ସିଂରେ ସଫଳତା ହାସଲ କରିପାରିଛି।
