ଭୁବନେଶ୍ୱର,୨୧ା୩(ବ୍ୟୁରୋ): ବ୍ରହ୍ମପୁର ରାଜ୍ୟର ଏକ ପ୍ରମୁଖ ସହର। ହେଲେ ଏଠାରେ ଆକାଶମାର୍ଗରେ ଯୋଗାଯୋଗ ବ୍ୟବସ୍ଥା ନାହିଁ। ଏହି ଆବଶ୍ୟକତାକୁ ପୂରଣ କରିବା ପାଇଁ ଉତ୍ତର ପ୍ରଦେଶର ଆଲ୍ଲାହାବାଦ(ପ୍ରୟାଗରାଜ) ପରି ରଙ୍ଗେଇଲୁଣ୍ଡା ଏୟାରଷ୍ଟ୍ରିପ୍ରେ ଏକ ବିମାନବନ୍ଦର ନିର୍ମାଣ କରାଯାଉ। କେନ୍ଦ୍ର ପକ୍ଷରୁ ଉଡାନ କାର୍ଯ୍ୟକ୍ରମ ଅଧୀନରେ ଏହା କରିବାକୁ ବିଜେଡି ରାଜ୍ୟ ସଭା ସଦସ୍ୟ ସସ୍ମିତ ପାତ୍ର ଶୁକ୍ରବାର ଦାବି କରିଛନ୍ତି। ଏହା କେବଳ ବ୍ରହ୍ମପୁର ନୁହେଁ ବରଂ ସମଗ୍ର ଦକ୍ଷିଣ ଓଡ଼ିଶାର ଯୋଗାଯୋଗକୁ ଦୃଢ଼ କରିବ ବୋଲି ସସ୍ମିତ କହିଛନ୍ତି। ଏହି ପ୍ରସଙ୍ଗକୁ ଗମ୍ଭୀରତା ସହ ନେବା ପାଇଁ ବେସାମରିକ ବିମାନ ଚଳାଚଳ ମନ୍ତ୍ରୀ ହରଦୀପ ସିଂ ପୁରୀଙ୍କୁ ସେ ଅନୁରୋଧ କରିଛନ୍ତି।
ଅନୁରୂପ ଭାବେ ଖୋର୍ଦ୍ଧା ଜିଲା ବାଘମାରୀ ନିକଟରେ ଥିବା ଅଟ୍ରି ଉଷ୍ମପ୍ରସ୍ରବଣ। ରାଜ୍ୟର ଏକ ପର୍ଯ୍ୟଟନସ୍ଥଳୀ ରୂପେ ପରିଗଣିତ। ତେଣୁ ଏଠାକୁ ପର୍ଯ୍ୟଟକ ଏବଂ ସ୍ଥାନୀୟ ଜନସାଧାରଣଙ୍କ ଯୋଗାଯୋଗକୁ ପୂର୍ବାପେକ୍ଷା ଅଧିକ ସୁବ୍ୟବସ୍ଥିତ କରିବା ପାଇଁ ଏକ ରେଳଷ୍ଟେଶନ କରିବା ପାଇଁ ସସ୍ମିତ ଦାବି କରିଛନ୍ତି। ସେହିପରି ଝାରସୁଗୁଡା ବିମାନବନ୍ଦର କାର୍ଯ୍ୟକ୍ଷମ ହୋଇସାରିଛି। ଏହାକୁ ଏୟାର କାର୍ଗୋ ହବ୍ରେ ପରିଣତ କରିବା ପାଇଁ ପୂର୍ବରୁ ବିଜ୍ଞାପିତ କରାଯାଇଥିଲା। ହେଲେ ଏ ନେଇ କାମ ଆରମ୍ଭ ହୋଇନାହିଁ। ଅନୁରୂପ ଭାବେ ଝାରସୁଗୁଡ଼ାକୁ କୃଷି ଉଡାନ କାର୍ଯ୍ୟକ୍ରମରେ ସାମିଲ କରିବା ପାଇଁ ବିଜେଡି ସଦସ୍ୟ ଉଚ୍ଚସଦନରେ ଦାବି କରିଛନ୍ତି। ପୂର୍ବଭଳି ଓଡ଼ିଶାକୁ ସ୍ବତନ୍ତ୍ର ଧ୍ୟାନକୈନ୍ଦ୍ରିକ ରାଜ୍ୟର ମାନ୍ୟତା ଦିଆଯିବା ସହ ଅର୍ଥ ପ୍ରଦାନ, ରେଳ ଏବଂ ଜାତୀୟ ରାଜପଥ ବୃଦ୍ଧି, ଟେଲି ଏବଂ ବ୍ୟାଙ୍କିଙ୍ଗ୍ ବ୍ୟବସ୍ଥା ସୁଦୃଢ କରିବା ପାଇଁ ବିଜେଡି ପକ୍ଷରୁ ଦାବି କରାଯାଇଛି।
