କଟକ ଅଫିସ,୧୫।୧୨- ରାଜ୍ୟର ବିଭିନ୍ନ ସ୍ଥାନରେ ଶନିବାର ଅନୁଷ୍ଠିତ ରାଷ୍ଟ୍ରୀୟ ଲୋକ ଅଦାଲତରେ ୧୫,୭୭୬ ମାମଲାର ସମାଧାନ କରାଯାଇଛି। ଏଥିସହ ଏ ବାବଦରେ ୭୧ କୋଟି ୪୨ ଲକ୍ଷ ଟଙ୍କା ଆଦାୟ ନିମନ୍ତେ ନିର୍ଦ୍ଦେଶ ଦିଆଯାଇଛି। ପକ୍ଷମାନଙ୍କଠାରୁ ଏହି ଟଙ୍କା ଆଦାୟ କରାଯିବ। ମିଳିଥିବା ସୂଚନା ଅନୁଯାୟୀ, ଲୋକ ଅଦାଲତରେ ୪୧୦୪ଟି ପ୍ରାକ୍ ବିବାଦୀୟ ମାମଲାର ସମାଧାନ କରାଯାଇ ସେ ବାବଦରେ ୧୦ କୋଟି ୩୩ ଲକ୍ଷ ୫୯ହଜାର ୬୦୨ ଟଙ୍କା ଆଦାୟ ପାଇଁ ନିର୍ଦ୍ଦେଶ ରହିଛି। ସେହିପରି ଲୋକ ଅଦାଲତରେ ୩୭୩୫ଟି ବ୍ୟାଙ୍କ ଅସୁଲ ମାମଲାର ସମାଧାନ କରାଯାଇ ସେ ବାବଦକୁ ୧୦ କୋଟି ୧ ଲକ୍ଷ ୩୦ହଜାର ୧୩୪ ଟଙ୍କା ଆଦାୟ ପାଇଁ ନିର୍ଦ୍ଦେଶ ଦିଆଯାଇଛି। ବିଦ୍ୟୁତ୍ ବିଲ୍ ଦେୟ ବାବଦୀୟ ୪୬ଟି ମାମଲାର ସମାଧାନ କରାଯାଇ ୭ ଲକ୍ଷ ୪୭ହଜାର ୧୯୨ଟଙ୍କା ଆଦାୟ ପାଇଁ ନିର୍ଦ୍ଦେଶ ଦିଆଯାଇଥିବାବେଳେ ୧୫ଟି ପାଣି ବିବାଦ ମାମଲା ସମାଧାନ କରାଯାଇ ୭୩,୨୪୧ ଟଙ୍କା ଆଦାୟ ପାଇଁ ନିର୍ଦ୍ଦେଶ ରହିଛି। ଏହି ଲୋକ ଅଦାଲତକୁ ରାଜ୍ୟ ଆଇନସେବା ପ୍ରାଧିକରଣର ସହ ସଚିବ ଜ୍ୟୋତିରଞ୍ଜନ ଦାଶ, ସଂସ୍ଥା ଅଧିକାରୀ କମଳାକାନ୍ତ କରଙ୍କ ସମେତ ବିଚାର ବିଭାଗ ଅଧିକାରୀମାନେ ଯୋଗଦେଇଥିଲେ। ସେହିପରି ହାଇକୋର୍ଟରେ ଅନୁଷ୍ଠିତ ଲୋକ ଅଦାଲତରେ ୧୫ଟି ମାମଲାର ସମାଧାନ କରାଯାଇ ୭ କୋଟି ୮୫ ଲକ୍ଷ ଟଙ୍କା ଆଦାୟ ପାଇଁ ନିର୍ଦ୍ଦେଶ ଦିଆଯାଇଛି।
