ମାଞ୍ଚେଷ୍ଟର, ୧୫ା୬ (ପି.ଟି.)-ଆସନ୍ତା ମାସରେ ଅନ୍ତର୍ଜାତୀୟ କ୍ରିକେଟ ଫେରିବ। ସେତେବେଳେ ଇଂଲଣ୍ଡ ବିପକ୍ଷ ମ୍ୟାଚରେ ଓ୍ବେଷ୍ଟଇଣ୍ଡିଜ ଫାଇଦାରେ ରହିବ ବୋଲି କହିଛନ୍ତି ଭ୍ରମଣକାରୀ ଦଳ କୋଚ୍ ଫିଲ୍ ସିମନ୍ସ। କୋଭିଡ୍-୧୯ ଯୋଗୁ ମ୍ୟାଚ ଜୈବ ସୁରକ୍ଷିତ ପରିବେଶରେ ଅନୁଷ୍ଠିତ ହେବ। ମହାମାରୀ ଯୋଗୁ ଅନ୍ତର୍ଜାତୀୟ କ୍ରିକେଟ ମାର୍ଚ୍ଚଠାରୁ ସସ୍ପେଣ୍ଡ ରହିଛି। ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ୩ ମ୍ୟାଚବିଶିଷ୍ଟ ଟେଷ୍ଟ ସିରିଜ ଜୁଲାଇ ୮ରୁ ସାଉଥାମ୍ପଟନଠାରେ ଆରମ୍ଭ ହେବ। ମ୍ୟାଚ୍ ରୁଦ୍ଧଦ୍ୱାରରେ ଅନୁଷ୍ଠିତ ହେଉଥିବାରୁ ଇଂଲଣ୍ଡ ଘରୋଇ ଦର୍ଶକଙ୍କଠାରୁ ଉତ୍ସାହ ପାଇବ ନାହିଁ। ସମର୍ଥକଙ୍କ ବ୍ୟତୀତ ଘରୋଇ ଦଳ ନିକଟରେ ପ୍ରତିଯୋଗିତାମୂଳକ କ୍ରିକେଟ ଖେଳି ନାହିଁ। ଆମେ କିନ୍ତୁ ନିଜ ଦେଶରେ କ୍ରିକେଟ ଖେଳି ଆସିଛୁ। ଟୁର୍ ପାଇଁ ଟ୍ରେନିଂ କ୍ୟାମ୍ପରେ ମଧ୍ୟ ଭାଗ ନେଇଛୁ। ଅନ୍ୟପକ୍ଷରେ ଇଂଲଣ୍ଡ ନିକଟରେ ବିଦେଶ ଟୁର୍ରୁ ଫେରିନାହିଁ। ଏହି ସବୁ ଦୃଷ୍ଟିରୁ ଆମ ଦଳ ଫାଇଦାରେ ରହିବ ବୋଲି ସିମନ୍ସ ଆଶା ପ୍ରକାଶ କରିଛନ୍ତି। ୧୮ମାସ ପୂର୍ବେ ଓ୍ବେଷ୍ଟଇଣ୍ଡିଜ ଟୁର୍ରେ ଯାଇଥିଲା ଇଂଲଣ୍ଡ। ଦଳ ସେଠାରେ ୨-୧ରେ ପରାଜିତ ହୋଇଥିଲା। ଇଂଲଣ୍ଡରେ ଯଦି ସିରିଜ ଡ୍ର ଭାବେ ଶେଷ ହୁଏ ତେବେ ଭ୍ରମଣକାରୀ ଦଳ ଓ୍ବିଜଡେନ୍ ଟ୍ରଫି ବଜାୟ ରଖିବ। କିନ୍ତୁ ଅନ୍ୟପକ୍ଷରେ ସିମନ୍ସ ସ୍ବୀକାର କରି କହିଛନ୍ତି ଯେ, ତାଙ୍କ ଦଳ ଶିମରନ ହେଟମେୟର, ଡାରେନ ବ୍ରାଭୋ ଓ କିମୋ ପଲ୍ଙ୍କ ଭଳି ଖେଳାଳିଙ୍କୁ ମିସ୍ କରିବ। ମହାମାରୀ ପାଇଁ ଏହି ୩ କ୍ରିକେଟର ୟୁନାଇଟେଡ କିଙ୍ଗଡମ୍ ଟୁର୍ରେ ନ ଯିବା ଲାଗି ନିଷ୍ପତ୍ତି ନେଇଥିଲେ।
