ରୁଷିଆ ଉପରେ କଟକଣା ବଢ଼ାଇବାକୁ ଯୋଜନା
6:42 amMay 16, 2023May 16, 2023 / 02

ମସ୍କୋ/କିଭ୍‌, ୧୬ା୫: ୟୁକ୍ରେନ ଉପରେ ତୁହାକୁ ତୁହା ମିଶାଇଲ ବର୍ଷା କରିଚାଲିଥିବା ରୁଷିଆ ଉପରେ କଟକଣା ବଢ଼ାଇବାକୁ ଜି୭ ସମିଟ୍‌ର ସଦସ୍ୟ ଦେଶ ଯୋଜନା ପ୍ରସ୍ତୁତ କରୁଛନ୍ତି। ଏ ସଂକ୍ରାନ୍ତରେ ଚଳିତ ସପ୍ତାହରେ ଜାପାନରେ ସମିଟ୍‌ ପକ୍ଷରୁ ବୈଠକ ଆୟୋଜନ କରାଯିବ। ଜି୭ ସମିଟ୍‌ ସଦସ୍ୟ ରାଷ୍ଟ୍ରଗୁଡ଼ିକର ବୈଠକ ମେ ୧୯ ଓ ୨୧ରେ କରାଯିବ। ବର୍ତ୍ତମାନ ସୁଦ୍ଧା ବହୁ ପାଶ୍ଚାତ୍ୟ ଦେଶ ରୁଷିଆ ଉପରେ କଟକଣା ଲଗାଇଛନ୍ତି। ୟୁକ୍ରେନ୍‌କୁ ଜର୍ମାନୀ ୨.୭ ବିଲିୟନ ୟୁରୋ ମୂଲ୍ୟର ସାମରିକ ସହାୟତା ଯୋଗାଇ ଦେବା ଲାଗି ଘୋଷଣା କରିଛି। ୟୁକ୍ରେନ୍‌ ରାଷ୍ଟ୍ରପତି ଭୋଲୋଡିମିର ଜେଲେନ୍‌ସ୍କି ଜର୍ମାନ୍‌ ଗସ୍ତରେ ଥିବାବେଳେ ଅନ୍ୟ ୟୁରୋପୀୟ ଦେଶ ମୁଖ୍ୟମାନଙ୍କୁ ଭେଟିଛନ୍ତି। ରୁଷିଆ ମିଶାଇଲ ମାଡ଼ରେ ସୋମବାର ସକାଳେ ୟୁକ୍ରେନ୍‌ର ଅଭିଭକାରେ ଏକ ହସ୍ପିଟାଲ ନଷ୍ଟ ହୋଇଯାଇଛି। ଘଟଣାରେ ୪ ଜଣଙ୍କ ମୃତ୍ୟୁ ଘଟିଥିବା ଡୋନେକ୍ସ ରିଜିଓନାଲ ଗଭର୍ନର ପାଭଲୋ କିରିଲେଙ୍କୋ ସୂଚନା ଦେଇଛନ୍ତି। ଅନ୍ୟପକ୍ଷରେ ରୁଷିଆର ଏସ୍‌ୟୁ-୨୭ ଫାଇଟର ଜେଟ୍‌ ବାଲଟିକ୍‌ ସାଗର ଆକାଶରୁ ଜର୍ମାନୀ ଓ ଫ୍ରାନ୍ସର ଦୁଇଟି ଏୟାର କ୍ରାଫ୍ଟକୁ ଘଉଡ଼ାଇ ଥିବା କହିଛି। ରୁଷିଆ ଫେଡେରେଶନ୍‌ ଷ୍ଟେଟ୍‌ ସୀମାରୁ ବାହାର କରିବା ପରେ ରୁଷିଆ ଯୁଦ୍ଧବିମାନ ସୁରକ୍ଷିତ ଭାବେ ଏୟାର୍‌ବେସ୍‌ରେ ପହଞ୍ଚତ୍ଥିବା ରୁଷିଆ ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ କୁହାଯାଇଛି।