ନୂଆଦିଲ୍ଲୀ,୧।୧୧- ସ୍ଥାନୀୟ ଅରୁଣ ଜେଟଲୀ ଷ୍ଟାଡିୟମରେ ଆସନ୍ତା ରବିବାର ଭାରତ ଓ ବାଂଲାଦେଶ ମଧ୍ୟରେ ପ୍ରଥମ ଟି୨୦ ଖେଳାଯିବ। ଏହି ମ୍ୟାଚ୍ ପୂର୍ବରୁ ବିରାଟ କୋହଲିଙ୍କ ଅନୁପସ୍ଥିତିରେ ଭାରତୀୟ ଦଳର ନେତୃତ୍ୱ ନେବାକୁ ଥିବା ରୋହିତ ଶର୍ମା ଆହତ ହୋଇଛନ୍ତି। ଏଣୁ ପ୍ରଥମ ମ୍ୟାଚ୍ରେ ତାଙ୍କ ଖେଳିବା ନେଇ ପ୍ରଶ୍ନ ଉଠିଛି। ଶୁକ୍ରବାର ବ୍ୟାଟିଂ କରୁଥିବାବେଳେ ତାଙ୍କ ବାମ ଥାଇରେ ବଲ ବାଜିଛି। ସେ ସଙ୍ଗେସଙ୍ଗେ ଅଭ୍ୟାସ ସେସନରୁ ଚାଲି ଯାଇଥିଲେ ଓ ଆଉ ଫେରି ନ ଥିଲେ। ନିର୍ଦ୍ଧିଷ୍ଟ ଭାବେ ବାଂଲାଦେଶର ମୁସ୍ତାଫିଜୁର ରେହମାନଙ୍କ ବଲକୁ ଉଚିତ ସମ୍ମୁଖୀନ ହେବା ପାଇଁ ବାମହାତୀ ସ୍ପୋଶାଲିଷ୍ଟ ଥ୍ରୋୟର ଶ୍ରୀଲଙ୍କାର ନୁଓ୍ବାନଙ୍କ ସହ ଅଭ୍ୟାସ କରୁଥିଲେ। ଦେଶରେ ପ୍ରାୟ ପ୍ରାକ୍ଟିସ ପିଚ୍ ଉନ୍ନତ ମାନର ନ ଥିବାରୁ ବ୍ୟାଟ୍ସମ୍ୟାନମାନେ ନେଟ୍ସରେ ବୋଲରଙ୍କୁ ଖେଳିବା ପୂର୍ବରୁ ରିଦିମକୁ ଆସିବା ପାଇଁ ବିଭିନ୍ନ ଏକ୍ସପର୍ଟଙ୍କ ଥ୍ରୋର ସମ୍ମୁଖୀନ ହୁଅନ୍ତି। ରୋହିତଙ୍କ ଉପଚାର ଦିଆଯାଉଛି। ତାଙ୍କ ସମସ୍ୟାର ସମ୍ପୂର୍ଣ୍ଣ ତଥ୍ୟ ଆସିବା ପରେ ଏ ସମ୍ପର୍କରେ କିଛି କୁହାଯାଇପାରିବ ବୋଲି ଦଳୀୟ ସୂତ୍ରରୁ ଜଣାପଡ଼ିଛି। ତେବେ ସଞ୍ଜୁ ସାମସନ ଫିଲ୍ଡିଂ ଅଭ୍ୟାସ କରୁଥିବାରୁ ତାଙ୍କୁ ଉଇକେଟକିପର ଭୂମିକାରେ ଦେଖିବାକୁ ମିଳିବ ନାହିଁ ବୋଲି ଜଣାପଡ଼ିଛି।
