ଭଟଲି,୨୬ା୪(ଡି.ଏନ.ଏ): ବର୍ତ୍ତମାନ କରୋନା (କୋଭିଡ-୧୯)ପାଇଁ ସମଗ୍ର ଭାରତ ବର୍ଷକୁ କେନ୍ଦ୍ର ସରକାର ଲକ୍ଡାଉନ୍ ଘୋଷଣା କରିଛନ୍ତି। ଏଥିପାଇଁ ସମଗ୍ର ଦେଶରେ ସାମାଜିକ ଦୂରତ୍ୱ ରକ୍ଷା କରିବା ପାଇଁ ବିଭିନ୍ନ ପ୍ରକାର କଡ଼ା ଆଇନ ପ୍ରଣୟନ ହୋଇଛି। କୌଣସି ଧାର୍ମିକ ଅନୁଷ୍ଠାନ ମଧ୍ୟ ଏହି କଟକଣାରୁ ବାଦ୍ ପଡ଼ିନାହିଁ। ତେବେ ମୁସଲମାନ ସମ୍ପ୍ରଦାୟଙ୍କ ରମ୍ଜାନ୍ ମାସ ଆରମ୍ଭ ହୋଇଥିବାରୁ ଭଟଲି ପ୍ରଶାସନ ପକ୍ଷରୁ ଏକ ବୈଠକ ବ୍ଲକ୍ ସଭାଗୃହରେ ଅନୁଷ୍ଠିତ ହୋଇଯାଇଛି। ଏହି ବୈଠକରେ କେତେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଥିଛି। ମସ୍ଜିଦ୍ ପରିସରରେ ମୌଲବୀଙ୍କ ସମେତ ସର୍ବାଧିକ ୪ ଜଣ ରହି ନମାଜ ପାଠ କରିପାରିବେ। ମସଜିଦ୍ରୁ ହିଁ ପ୍ରତିଦିନ ଅଜାନ ପରେ ଉପାସ ସମୟ ବିଷୟରେ ମୌଲବି ସଚେତନ କରିବା ସହିତ ସାମାଜିକ ଦୂରତ୍ୱ ରକ୍ଷା ପାଇଁ ଡାକବାଜି ଯନ୍ତ୍ର ସାହଯ୍ୟରେ ଜଣାଇପାରିବେ। ନିଜ ଘର ବା ପରିବାର ସଦସ୍ୟଙ୍କ ବ୍ୟତୀତ ଅନ୍ୟ କେହି ବାହାର ବ୍ୟକ୍ତି ଘରକୁ ଆସି ଭିଡ଼ ଜମାଇ ନମାଜ ପାଠ କରିପାରିବେ ନାହିଁ। କୌଣସି ମୌଲବି କୌଣସି ଘରକୁ ଯାଇ ନମାଜ ପାଠ କରାଇପାରିବେ ନାହିଁ। ଉପାସ ପରେ ଆବଶ୍ୟକ ସାମଗ୍ରୀ କିଣିବା ପାଇଁ କୌଣସି ଦୋକନରେ ଭିଡ଼ କରି ପାରିବେ ନାହିଁ କିମ୍ବା ବିନା କାରଣରେ ବାହାରକୁ ଆସି ପାରିବେ ନାହିଁ। ପ୍ରଶାସନର ଏହି ନିଷ୍ପତ୍ତିକୁ ସମ୍ପ୍ରଦାୟ ପକ୍ଷରୁ ସ୍ବାଗତ କରାଯାଇଛି। ତେବେ ଏହି ବୈଠକରେ ବିଡିଓ ଧୀରେନ୍ଦ୍ର କୁମାର ସେଠୀ, ତହସିଲଦାର ପ୍ରଶାନ୍ତ କୁମାର ମହାପାତ୍ର, ଥାନା ଅଧିକାରୀ ରଞ୍ଜିତ କୁମାର ନାଏକ, ମୌଲବି ମହମ୍ମଦ ଇଦ୍ରିସ୍, ମୁସ୍ଲିମ୍ କିମିଧିର ସଭାପତି ଅବଦୁଲ ଗନି ଖାଁ, ସମ୍ପାଦକ ହାଜି ସେଖ ଅଲ୍ଲି, ଅବଦୁଲ ଫାରୁକ୍ ଖାଁ, ଗୁଲାପ ବେଗ ଏବଂ ସେଖ୍ ଫାଇଜାନ ପ୍ରମୁଖ ଉପସ୍ଥିତ ଥିଲେ।
