ନୂଆଦିଲ୍ଲୀ,୨୬।୪: ଦେଶରେ କରୋନା ସଂକ୍ରମିତଙ୍କ ବୃଦ୍ଧିକୁ ନେଇ ଚିନ୍ତା ବଢୁଥିବା ବେଳେ କେନ୍ଦ୍ର ସରକାର ଓ ପଶ୍ଚିମବଙ୍ଗ ସରକାରଙ୍କ ମଧ୍ୟରେ ତୁତୁମେମେ ଜାରି ରହିଛି। ଭାରତୀୟ ଜନତା ପାର୍ଟି(ଭାଜପା)ର ରାଷ୍ଟ୍ରୀୟ ମହାସଚିବ ତଥା ପଶ୍ଚିମବଙ୍ଗ ପାର୍ଟି ପ୍ରଭାରୀ କୌଳାସ ବିଜୟଭର୍ଗିୟ ଓ ପଶ୍ଚିମବଙ୍ଗର ଭାଜପା ଏମ୍ପି ବାବୁଲ ସୁପ୍ରିୟୋ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ କାର୍ଯ୍ୟକୁ ନେଇ ନିଜ ନିଜ ଘରେ ରବିବାର ବିରୋଧ ପ୍ରଦର୍ଶନ କରିଥିବା ଦେଖାଯାଇଛି। କରୋନା ସଙ୍କଟ ଯୋଗୁ ଏହି ବିରୋଧ ପ୍ରଦର୍ଶନ ଭିଡିଓ ମାଧ୍ୟମରେ କରାଯାଉଛି। ଏଥିରେ ଅନ୍ୟ ଭାଜପା ନେତାମାନେ ମଧ୍ୟ ସାମିଲ ହେଉଛନ୍ତି। ବିଜୟଭର୍ଗିୟ ଇନ୍ଦୋରରେ ଓ ସୁପ୍ରିୟୋ ଦିଲ୍ଲୀଠାରେ ଧାରଣାରେ ବସିଛନ୍ତି। ଏମାନଙ୍କର ଅଭିଯୋଗ ହେଲା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ତାଙ୍କ ସହଯୋଗୀ ରାଜ୍ୟରେ କରୋନା ସଂକ୍ରମିତଙ୍କ ତଥ୍ୟ ଲୁଚାଇବା ସହ ଏହାକୁ ଗୁରୁତର ସହ ନେଉନାହାନ୍ତି। ଏହାସହ ପଶ୍ଚିମବଙ୍ଗରେ ଲକ୍ଡାଉନ ନିୟମକୁ ମଧ୍ୟ ଉଲ୍ଲଂଘନ କରାଯାଉଛି।
