ସୁନ୍ଦରଗଡ଼, ୧୮।୪(ଡି.ଏନ୍.ଏ.): କରୋନା ସଂକ୍ରମଣକୁ ରୋକିବା ନିମନ୍ତେ ଲକ୍ଡାଉନ୍ ଅବଧି ମେ ୩ କୁ ବୃଦ୍ଧି ପାଇଛି। ଏଭଳି ସ୍ଥିତିରେ ସୁନ୍ଦରଗଡ଼ ଜିଲାରେ ପୂର୍ବରୁ ଲଗ୍ନ ସ୍ଥିର ହୋଇଥିବା ବର କନ୍ୟା ମୁହଁରେ ମାସ୍କ ପିନ୍ଧି ସାମାଜିକ ଦୂରତ୍ୱ ରକ୍ଷା କରି ବିବାହ ବନ୍ଧନରେ ଆବଦ୍ଧ ହୋଇଛନ୍ତି। ସରକାରୀ ନୀତି ନିୟମାନୁଯାୟୀ ଉଭୟ ପକ୍ଷ ମାସ୍କ ପିନ୍ଧି ସାମାଜିକ ଦୂରତା ରଖି ବିବାହରେ ସାମିଲ ହୋଇଥିଲା।
ମିଳିଥିବା ସୂଚନା ଅନୁସାରେ, ସୁନ୍ଦରଗଡ଼ର ଜଣାଶୁଣା ଆଇନଜୀବୀ ତଥା ସମାଜ ସେବୀ ସ୍ନେହଲତା ଓ ଶିକ୍ଷକ ମଦନ ମୋହନ ପଟେଲଙ୍କ ଏକ ମାତ୍ର ପୁଅ ଅମ୍ରିତଙ୍କ ବିବାହ ଲେଫ୍ରିପଡ଼ା ବ୍ଲକ ଝାରଗାଁ ନିବାସୀ ଅରୁଣ ପଟେଲ ସୁଷମାଙ୍କ କନ୍ୟା ଶୁଭଶ୍ରୀଙ୍କ ସହିତ ବିବାହ ସକାଶେ ଗତ ଅପ୍ରେଲ ୧୧ ତାରିଖ ରେ ପ୍ରଥମେ ସ୍ଥିର ହୋଇଥିଲା। ମାତ୍ର ଲକ ଡାଉନ ଅବଧି ସରି ନ ଥିବାରୁ ଏହି ବିବାହ ଅପ୍ରେଲ ୧୭ ହେବାକୁ ଧାର୍ଯ୍ୟ। ହେଲେ ଲକ୍ଡାଉନ୍ ଅବଧି ପୁଣି ବଢିଥିବା ପରେ ଉଭୟ ପରିବାର ପ୍ରଶାସନର ଅନୁମତି ଆଣି ଏହି ବିବାହ କରିବା ପାଇଁ ନିଷ୍ପତ୍ତି ନେଇଥିଲେ। ଏହି ବିବାହ ବେଳେ ବେଦୀ ଉପରେ ପଣ୍ଡିତ ମଧ ସାମାଜିକ ଦୂରତ୍ୱକୁ ବଜାୟ ରଖି ମନ୍ତ୍ର ଉଚ୍ଚାରଣ କରି ବରକନ୍ୟାଙ୍କ ହାତଗଣ୍ଠି ପକାଇଥିଲେ। ବିବାହ ଉତ୍ସବ ରେ ଯୋଗ ଦେବାକୁ ଆସିଥିବା ଲୋକଙ୍କୁ ପ୍ରଥମେ ସେମାନଙ୍କ ହାତରେ ସାନିଟାଇଜର ଦିଆଯାଇଥିଲା।
