ପୁରୀ ଅଫିସ, ୨୩।୩: କରୋନାର ଭୟାବହତାକୁ ଦୃଷ୍ଟିରେ ରଖି ରାଜ୍ୟ ସରକାର ପୁରୀ ସହରକୁ ଲଗ୍ଡାଉନ୍ ଘୋଷଣା କରିଛନ୍ତି। ସୋମବାର ଲକ୍ଡାଉନ୍ର ଦ୍ୱିତୀୟ ଦିନରେ ସହରବାସୀ ବିଭିନ୍ନ ସ୍ଥାନରେ ପ୍ରଶାସନିକ ନିର୍ଦ୍ଦେଶକୁ ଉଲ୍ଲଂଘନ କରୁଥିବା ଦେଖିବାକୁ ମିଳିଛି। ବିଶେଷକରି ପରିବା ମାର୍କେଟରେ ଭିଡ଼ ଅସମ୍ଭାଳ ରହିଥିଲା। ପୋଲିସ ଏବଂ ପ୍ରଶାସନ ପକ୍ଷରୁ ଡାକବାଜି ଯନ୍ତ୍ର ଯୋଗେ ଜନସାଧାରଣଙ୍କୁ ସଚେତନ କରାଯାଉଥିଲେ ମଧ୍ୟ ଅନେକେ ବିଭିନ୍ନ ପ୍ରକାର ବାହାନା ଦେଖାଇ ରାସ୍ତାଘାଟରେ ବୁଲୁଛନ୍ତି। ପୋଲିସ ପକ୍ଷରୁ ବଡ଼ଶଙ୍ଖ ପରିବା ମାର୍କେଟରେ ବ୍ୟବସାୟୀ ଓ ଗ୍ରାହକଙ୍କୁ ସାମାଜିକ ଦୂରତ୍ୱ ରକ୍ଷା କରିବା ଲାଗି ଦୀର୍ଘ ସମୟ ଧରି ସଚେତନ କରାଯାଇଥିଲା। କିନ୍ତୁ ରବିବାର ଜନତା କର୍ଫ୍ୟୁକୁ ଯେଉଁଭଳି ଭାବେ ପୁରୀବାସୀ ସମର୍ଥନ କରିଥିଲେ ଲକ୍ଡାଉନ୍କୁ ସେଭଳି ସହଯୋଗ କରୁ ନ ଥିବା ଦେଖିବାକୁ ମିଳୁଛି।
