ବେଗୁନିଆ,୯।୪ (ଡି.ଏନ୍.ଏ): ଖୋର୍ଦ୍ଧା ଜିଲା ବେଗୁନିଆ ପୋଲିସ ଗୁରୁବାର ଏକ ଦେଶୀ ରନ୍ଧା ମଦଭାଟି ଉପରେ ଚଢ଼ାଉ କରିଥିବା ସୂଚନା ମିଳିଛି। ଏହି ଘଟଣାରେ ମାଫିଆମାନେ ଫେରାର ହୋଇଯାଇଥିବା ବେଳେ ପୋଲିସ ୨ହଜାର ଲିଟର ପୋଚକୁ ନଷ୍ଟ କରିବା ସହ ଅନ୍ୟାନ୍ୟ ସରଞ୍ଜାମ ଜବତ କରିଥିବା ଜଣାପଡ଼ିଛି।
ସୂଚନାନୁଯାୟୀ, ବେଗୁନିଆ ଓ ବୋଲଗଡ଼ ସୀମାନ୍ତବର୍ତ୍ତୀ ଅଞ୍ଚଳରେ ଥିବା ଏକଡ଼ାଳିଆ କାଜୁ ଜଙ୍ଗଲ ପରିସରରେ ମଦ ପ୍ରସ୍ତୁତ କରାଯାଉଥିବାର ଖବର ପୋଲିସକୁ ମିଳିଥିଲା। ଥାନାଧିକାରୀ ରଶ୍ମୀ ରଞ୍ଜନ ସାହୁ ଏବଂ ଫାଣ୍ଡି ଅଧିକାରୀ ଅଶୋକ କୁମାର ପଣ୍ଡାଙ୍କ ନେତୃତ୍ୱରେ ଏକ ୧୨ଜଣିଆ ପୋଲିସ ଟିମ୍ ଗଠନ କରାଯାଇଥିଲା। ସେମାନେ ୫ ଏକର ପରିମିତ ଜଙ୍ଗଲକୁ ଚତୁଃପାର୍ଶ୍ୱରୁ ସିଲ୍ କରିଥିଲା। ହେଲେ ଏନେଇ ମାଫିଆମାନେ ସୂଚନା ପାଇଯାଇଥିଲେ। ଫଳରେ ପୋଲିସ ପହଞ୍ଚିବା ପରେ କେବଳ ୨ହଜାର ଲିଟର ପୋଚ୍, ଗୁଡ ଭର୍ତ୍ତୀ ଟିଣ, ୟୁରିଆ, ଜାରକିନ୍ , ହଣ୍ଡା ଆଦି ମଦ ତିଆରି ସରଞ୍ଜାମ ଜବତ କରିଥିଲା। ପୋଲିସ ଘଟଣାର ଅଧିକ ତଦନ୍ତ ଜାରି ରଖିଛି। ତେବେ ଲକ୍ଡାଉନ୍କୁ ନେଇ ପୋଲିସ ଗାଁକୁ ଗାଁ ବୁଲି ପହରା ଦେଉଥିବାର ସୁଯୋଗ ନେଇ ମଦ ଓ ଖଣି ମାଫିଆମାନଙ୍କ ପାଇଁ ସୂଯୋଗ ସୃଷ୍ଟି ହୋଇଛି ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି।
