କେନ୍ଦ୍ରାପଡ଼ା ଅଫିସ, ୨୬।୪-ଗତ ୩ ଦିନ ଧରି କେନ୍ଦ୍ରାପଡ଼ା ଜିଲାରେ ବର୍ଷା ଲାଗି ରହିଛି। ଲଗାଣ ବର୍ଷା ଯୋଗୁ ଜିଲାର ଚାଷୀଙ୍କ ପନିପରିବା ଓ ରବି ଫସଲ ଉଜୁଡ଼ି ଯାଇଛି। କରୋନା ମହାମାରୀ ପାଇଁ ତାଲାବନ୍ଦ ଯୋଗୁ ଚାଷୀଙ୍କୁ ଉପଯୁକ୍ତ ବଜାର ମିଳୁ ନ ଥିବା ବେଳେ ଲଗାଣ ବର୍ଷା ସେମାନଙ୍କ ଆର୍ଥିକ ମେରୁଦଣ୍ଡଙ୍କୁ ଭାଙ୍ଗି ଦେଇଛି ବୋଲି ଚାଷୀମାନେ ମତ ଦେଇଛନ୍ତି।
ଏ ସମ୍ପର୍କରେ ବଗଡ଼ା ଗ୍ରାମର ଚାଷୀ ଅକ୍ଷୟ କୁମାର ସାମଲ କହିଛନ୍ତି, ଚଳିତ ବର୍ଷ ୪ଏକର ଜମିରେ ପୋଟଳ ଚାଷ କରିଥିଲେ। ଫସଲ ଅମଳ ସମୟରେ ବର୍ଷା ଯୋଗୁ ଫସଲ ସମ୍ପୂର୍ଣ୍ଣ ନଷ୍ଟ ହୋଇଛି। ଏଥିସହ ଦେଶରେ ତାଲାବନ୍ଦ ଯୋଗୁ ପୋଟଳ ବିକ୍ରି ହୋଇ ପାରିନାହିଁ। କଂସାର ଗ୍ରାମର ଚାଷୀ ନିରଞ୍ଜନ ପରିଡ଼ା କୁହନ୍ତି ଯେ, ଲଗାଣ ବର୍ଷା ରବି ଫସଲକୁ ନଷ୍ଟ କରିଦେଇଛି। ତାଲାବନ୍ଦ ଯୋଗୁ ଖରିଫ ଧାନ ମଣ୍ଡିରେ ବିକ୍ରି ନ ହୋଇ ପଡିରହିଛି ା ବିରି ଓ ମୁଗ ବିକ୍ରି କରି କିଛି ଟଙ୍କା ଆୟ ପାଇଁ ଚାଷୀମାନେ ଯେଉଁ ଆଶା ବାନ୍ଧିଥିଲେ, ଏହି ଲଗାଣ ବର୍ଷା ଯୋଗୁ ରବି ଫସଲ ବି ଉଜୁଡ଼ି ଗଲା। ଅମଳ ସମୟରେ ବର୍ଷା ଯୋଗୁ ତାଙ୍କର ୨ ଏକର ବିରି ଫସଲ ନଷ୍ଟ ହୋଇଥିବା ନିରଞ୍ଜନ ପ୍ରକାଶ କରିଛନ୍ତି। କୃଷକ ନେତା ଗୟାଧର ଧଳ କହିଛନ୍ତି, ଗତ ୩ ଦିନ ଧରି ଜିଲାରେ ପ୍ରାୟ ୧୦୦ ମିଲିମିଟର ବର୍ଷା ହୋଇଛି। ରବି ଫସଲ ଅମଳ ସମୟରେ ଏହି ବର୍ଷା ହୋଇଥିବାରୁ ବିରି, ମୁଗ, ବାଦାମ ଆଦି ରବି ଫସଲ ନଷ୍ଟ ହୋଇଯାଇଛି। ସେହିପରି ପନିପରିବା ଚାଷ ନଷ୍ଟ ହୋଇଥିବାରୁ ଚାଷୀଙ୍କୁ ଉପଯୁକ୍ତ କ୍ଷତିପୂରଣ ଦିଆଯାଉ ବୋଲି ଗୟାଧର ଦାବି କରିଛନ୍ତି।
