ନୂଆଦିଲ୍ଲୀ,୧୯ା୬(ପି.ଟି.): ସପ୍ତଦଶ ଲୋକ ସଭାର ଦ୍ୱିତୀୟ ଦିବସରେ ମଙ୍ଗଳବାର ଆଉ କେତେକ ସଦସ୍ୟ ଶପଥଗ୍ରହଣ କରିଛନ୍ତି। କଂଗ୍ରେସର ବରିଷ୍ଠ ନେତ୍ରୀ ତଥା ୟୁପିଏ ଅଧ୍ୟକ୍ଷା ସୋନିଆ ଗାନ୍ଧୀ, ସମାଜବାଦୀ ପାର୍ଟି ନେତା ମୁଲାୟମ୍ ସିଂ ଯାଦବ ପ୍ରମୁଖ ଗୃହରେ ଶପଥ ନେଇଛନ୍ତି। ରାଏବରେଲିରୁ ବିଜୟୀ ହୋଇଥିବା ସୋନିଆ ହିନ୍ଦୀରେ ଶପଥଗ୍ରହଣ କରିଛନ୍ତି। ସମାଜବାଦୀ ପାର୍ଟି ନେତା ମୁଲାୟମ ସିଂ ଯାଦବ ଅସୁସ୍ଥ ଥିବାରୁ ତାଙ୍କୁ ତାଙ୍କ ପୁଅ ତଥା ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ ହ୍ବିଲ୍ଚେୟାର୍ରେ ଆଣିଥିଲେ। ଅନୁମତିକ୍ରମେ ସେ ନିଜ ଆସନରେ ବସି ଶପଥଗ୍ରହଣ କରିଥିଲେ। ଆଜମ୍ଗଡ଼ରୁ ବିଜୟୀ ହୋଇଥିବା ଅଖିଳେଶ ମଧ୍ୟ ଶପଥ ନେଇଥିଲେ। ଏନଡିଏର ବାଚସ୍ପତି ପ୍ରାର୍ଥୀ ହୋଇଥିବା ଓମ୍ ବିର୍ଲା ଶପଥଗ୍ରହଣ କରିବାବେଳେ ତାଳିମାଡ଼ କରାଯାଇଥିଲା। ଅନେକ ନବନିର୍ବାଚିତ ସଦସ୍ୟ ମଙ୍ଗଳବାର ଶପଥଗ୍ରହଣ କରିଥିବାବେଳେ ବାକିଥିବା ସଦସ୍ୟଙ୍କୁ ବୁଧବାର ଶପଥପାଠ କରାଯିବ ବୋଲି ଜଣାପଡ଼ିଛି।
