ବାରିପଦା ଅଫିସ/ବୈଶିଙ୍ଗା(ଡି.ଏନ୍.ଏ.),୮ା୧୨- ମୟୂରଭଞ୍ଜ ଜିଲା ବୈଶିଙ୍ଗା ଥାନା ଅଧୀନ ଖୁଣ୍ଟାପୁର ଗ୍ରାମରେ ଶଶୁରଙ୍କୁ ଅତି ନିର୍ମମ ଭାବେ ହତ୍ୟା କରିଛି ଜ୍ୱାଇଁ। ଅଭିଯୁକ୍ତ ଜ୍ୱାଇଁ ରାଜୁ ସିଂଙ୍କୁ ଗିରଫ କରିଛି ପୋଲିସ। ତାଙ୍କୁ ବାଲେଶ୍ୱର ଜିଲା ରୂପସା ଥାନା ଅଞ୍ଚଳରୁ ଗିରଫ କରାଯାଇଛି। ହତ୍ୟାକାଣ୍ଡରେ ବ୍ୟବହୃତ ଦାଆକୁ ପୋଲିସ ଜବତ କରିଛି। ମୃତକ ବେତନଟୀ ଥାନା କ୍ଷୀରିପଦା ଗ୍ରାମର ରମେଶ ସିଂଙ୍କ ସ୍ତ୍ରୀ ସଂଯୁକ୍ତାଙ୍କ ଅଭିଯୋଗ କ୍ରମେ ପୋଲିସ ଏକ ହତ୍ୟା ମାମଲା (ନଂ. ୨୯୧/୨୦) ରୁଜୁ କରି ତଦନ୍ତ ଜାରି ରଖିଛି ।
ତଦନ୍ତକାରୀ ଅଫିସର ଲକ୍ଷ୍ମୀଧର ସ୍ବାଇଁଙ୍କ ସୂଚନା ଅନୁଯାୟୀ, ନାତିର ପ୍ରଥମାଷ୍ଟମୀ ପାଇଁ ଆସିଥିବା ରମେଶଙ୍କୁ ଜ୍ୱାଇଁ ରାଜୁ ଓ ତାଙ୍କ ବଡ଼ଭାଇ ଲବ ହାତ ଗୋଡ଼ ବାନ୍ଧି ଏକ ଦାଆରେ ଗଳାକାଟି ନୃଶଂସ ଭାବେ ହତ୍ୟା କରିଥିଲେ। ହତ୍ୟାକାଣ୍ଡ ପରେ ରାଜୁ ଓ ତାଙ୍କ ଭାଇ ଫେରାର ହୋଇ ଯାଇଥିଲେ। ପୋଲିସ ରାଜୁଙ୍କୁ ଗିରଫ କରିଥିବା ବେଳେ ତାଙ୍କ ଭାଇ ଲବଙ୍କୁ ଧରିବା ଲାଗି ଚଢ଼ାଉ ଜାରି ରଖିଛି।
