ଅମରପାଲି, ୧୮।୧୦(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ସୁବଳୟା ଥାନା ପିତାମହୁଲ ଗ୍ରାମରେ ଗୁରୁବାର ରାତିରେ ଏକ ଅଭାବନୀୟ ଘଟଣା ଘଟିଛି। ଯନ୍ତୁ ଶିକାର ପାଇଁ ବିଛାଯାଇଥିବା ବିଦ୍ୟୁତ୍ ତାର ସଂସ୍ପର୍ଶରେ ଆସି ବାପା ଓ ବଡ଼ ପୁଅଙ୍କ ମୃତ୍ୟୁ ଘଟିଥିବା ବେଳେ ସାନ ପୁଅ ଗୁରୁତର ହୋଇଛନ୍ତି। ମୃତକ ଦ୍ୱୟ ହେଲେ ବାପା ସହଦେବ ସାହୁ(୫୭) ଓ ବଡ଼ ପୁଅ ଦେବାନନ୍ଦ(୩୮)। ଗୁରୁତର ସାନ ପୁଅ ହେଲେ ଅରୁପାନନ୍ଦ ସାହୁ(୨୫)।
ପ୍ରକାଶ ଯେ, ଯନ୍ତୁ ଶିକାର ପାଇଁ ପିତାମହୁଲ ଗାଁ ବାଉରିଜୋର ଜଙ୍ଗଲରେ ୧୧ କେଭି ବିଦ୍ୟୁତ୍ ତାର ବିଛାଯାଇଥିଲା। ଗୁରୁବାର ରାତିରେ ବାପା ସହଦେବ ଦୁଇ ପୁଅ ଦେବାନନ୍ଦ ଓ ଅରୁପାନନ୍ଦଙ୍କ ସହ କୌଣସି କାମରେ ସେଠାକୁ ଯାଇଥିବା ବେଳେ ବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲେ। ଘଟଣାସ୍ଥଳରେ ସହଦେବ ଓ ବଡ଼ ପୁଅ ଦେବାନନ୍ଦଙ୍କ ମୃତ୍ୟୁ ଘଟିଛି। ସାନପୁଅ ଅରୁପାନନ୍ଦଙ୍କୁ ଗୁରୁତର ଅବସ୍ଥାରେ ପ୍ରଥମେ ସୋନପୁର ଓ ପରେ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଛି।
