ଦଶମନ୍ତପୁର,୨୮।୧୧(ଡି.ଏନ୍.ଏ.) ଦଶମନ୍ତପୁର ବ୍ଲକ ଲୁଲ୍ଲା ପଞ୍ଚାୟତ ଦୋଲଦୋଲା ଗ୍ରାମରେ ୨ ମାସ ହେବ ଗାଁ ଲୋକେ ବୁନ୍ଦାଏ ପାଣି ପାଇଁ ଡହଳ ବିକଳ ହେଉଛନ୍ତି। ଗାଁରେ ୫୦ ଘର ରହୁଥିବା ବେଳେ ଜନସଂଖ୍ୟା ୨୦୦ରୁ ଅଧିକ। ଗାଁରେ ୩ଟି ନଳକୂପ ଥିବାବେଳେ ସେଥିରୁ ବର୍ତ୍ତମାନ ୨ଟି ଅଚ଼ଳ ହୋଇ ପଡ଼ିଛି। ଗୋଟିଏ ନଳକୂପରୁ ବିଦ୍ୟୁତ ମାଧ୍ୟମରେ ଟାଙ୍କିରେ ଜଳ ସଂରକ୍ଷଣ କରି ଏହାକୁ ଯୋଗାଇବା ପାଇଁ ଯୋଜନା କରାଯାଇଥିଲା। କିନ୍ତୁ ଥ୍ରୀ-ଫେଜ୍ ବିଦ୍ୟୁତ ସମସ୍ୟା ଯୋଗୁ ଟାଙ୍କିକୁ ପାଣି ଚଢୁ ନ ଥିବା ଗ୍ରାମବାସୀ କହିଛନ୍ତି। ଗାଁରୁ ଦେଢ଼ କିମି ଦୂର ଜଙ୍ଗଲିଆ ରାସ୍ତା ଦେଇ ପିଟଚୋଲ ଝୋଲା ଓ କଦମଝୋଲାରୁ ବହୁ କଷ୍ଟରେ ମହିଳାମାନେ ଜଳ ସଂଗ୍ରହ କରି ଆଣୁଛନ୍ତି ଓ ଏହାକୁ ହିଁ ପାନୀୟ ଭାବେ ବ୍ୟବହାର କରୁଥିବା କହିଛନ୍ତି ଜଗବନ୍ଧୁ ସାଉନ୍ତା, ପାଣ୍ଡୁ ସାଉନ୍ତା, ସିମା ଜାନୀ, ଫକିର ସାଉନ୍ତା, ନାଥ ହିକ୍କା, ଦର୍ଶନ ସାଉନ୍ତା, ପାନ ଜାନୀ, ସାଲ ସାଉନ୍ତା, ତୁଲା ହିକ୍କା। ୨୦୧୩ରେ ଏଭଳି ଝୋଲାର ଜଳ ବ୍ୟବହାର କରି ଗ୍ରାମର ୧୦ରୁ ଉଦ୍ଧର୍ବ ଲୋକେ ଅସୁସ୍ଥ ହୋଇଥିଲେ। ପାନୀୟ ଜଳ ସମସ୍ୟା ନେଇ ବ୍ଲକ ପ୍ରଶାସନ ଓ ଆର୍ଡବ୍ଲ୍ୟୁଏସ୍ଏସ୍ କାର୍ଯ୍ୟାଳୟରେ ଜଣାଇଥିଲେ ମଧ୍ୟ କିଛି ଫଳ ମିଳୁନାହିଁ ଲକି ହିକ୍କା, ମକର ସାଉନ୍ତା, ଅଁଲା ଜାନୀ, ରୁକ ଜାନୀ, ସୁବାଇ ସାଉନ୍ତା, ସାବିତ୍ରୀ ହିକ୍କା, ଡମାଇ ସାଉନ୍ତା କହିଛନ୍ତି। ଅଚ଼ଳ ନଳକୂପ ମରାମତି ସହ ଗାଁ ନିକଟସ୍ଥ ଯୋଗୀମାଳି ପାହାଡ଼ ଦେଇ ପ୍ରବାହିତ ହୁଆଡୋଙ୍ଗ ଓ ସାକଡ଼ାଡୋଙ୍ଗରେ ଥିବା ୨ ଜୋରରୁ ଟାଙ୍କି ଜରିଆରେ ଜଳ ଯୋଗାଇବା ପାଇଁ ଗ୍ରାମବାସୀ ଦାବି କରିଛନ୍ତି। ଏ ସଂପର୍କରେ ଆର୍ଡବ୍ଲ୍ୟୁଏସ୍ଏସ୍ କନିଷ୍ଠ ଯନ୍ତ୍ରୀ ଧର୍ମେନ୍ଦ୍ର ନାୟକଙ୍କୁ ଯୋଗାଯୋଗ କରିବାରୁ ସେ କହିଛନ୍ତି, ଆମ ବ୍ଲକରେ ଥିବା ୧୬ଟି ପଞ୍ଚାୟତ ପାଇଁ ଗୋଟିଏ ମାତ୍ର ଗାଡ଼ି ନିୟୋଜିତ ଅଛି। ତେଣୁ ଗାଁକୁ ଗାଁ ବୁଲି ପାଣି ସମସ୍ୟା ଦୂର କରିବା କଷ୍ଟକର ହେଉଛି। ଆଉ ଏକ ଗାଡ଼ି ଲଗାଇବା ପାଇଁ ସେ ବିଡିଓଙ୍କୁ ଜଣାଇଛନ୍ତି।
