ମୁମ୍ବାଇ: କରୋନା ଲକ୍ଡାଉନ ଯୋଗୁ ମାର୍ଚ୍ଚ ୨୨ଠାରୁ ସମସ୍ତ ଫିଲ୍ମ ଓ ସିରିୟଲ୍ ଶୁଟିଂ ବନ୍ଦ ରହିଛି। ଫଳରେ କଳାକାରମାନେ ହାତବାନ୍ଧି ଘରେ ବସି ରହିଛନ୍ତି। ନିକଟରେ ନୂଆ ଗାଇଡ୍ଲାଇନ୍ ଅନୁସାରେ ଶୁଟିଂ କରିବାକୁ ସରକାର ଅନୁମତି ଦେଇଛନ୍ତି। ଅନୁମତି ମିଳିବା ପରେ ଲକ୍ଡାଉନରେ ନିଜ ସହରକୁ ଫେରିଯାଇଥିବା ସମସ୍ତ କଳାକାର ଏବେ ମୁମ୍ବାଇକୁ ଫେରିଛନ୍ତି। ସେଥିମଧ୍ୟରୁ ସିରିୟଲ୍ ‘ଗୁଡ୍ଡନ ତୁମେସ ନ ହୋ ପାଏଗା’ର ଗୁଡ୍ଡନ ଫେମ୍ କନିକା ମାନ ମଧ୍ୟ ରହିଛନ୍ତି। କନିକା ନିଜ ମା’ଙ୍କ ସହ ପାନିପତରୁ ମୁମ୍ବାଇକୁ ଆସିଛନ୍ତି। ଫରିବା ପରେ ଘରୁ ହିଁ ସେ ଶୁଟିଂ ଆରମ୍ଭ କରିଦେଇଛନ୍ତି। ତେବେ ମୁମ୍ବାଇ ଫେରିବା ପରେ ରହୁଥିବା ସୋସାଇଟିରେ ତାଙ୍କୁ ଓ ତାଙ୍କ ମା’ଙ୍କୁ ଏଣ୍ଟ୍ରି ମିଳି ନ ଥିଲା ବୋଲି ସେ କହିଛନ୍ତି। ସୋସାଇଟି ଲୋକଙ୍କୁ ବହୁ ବୁଝାସୁଝା କରିବା ସହ ମୁମ୍ବାଇ ଏୟାରପୋର୍ଟ ଥର୍ମାଲ ସ୍କ୍ରିନିଂ, ଆରୋଗ୍ୟ ସେତୁ ଆପ୍ରେ ସ୍ବାସ୍ଥ୍ୟ ସମ୍ବନ୍ଧୀୟ ସୂଚନା ଦାଖଲ କରାଯାଇଛି ବୋଲି ସେ କହିଥିଲେ। ଏଥିସହ ୧୫ଦିନର କ୍ୱାରାଣ୍ଟାଇନ୍ ନିୟମ ମଧ୍ୟ ପାଳନ କରିବୁ କହିବା ପରେ ସୋସାଇଟି ଲୋକ ତାଙ୍କୁ ଫ୍ଲାଟରେ ରହିବାକୁ ଅନୁମତି ଦେଇଥିଲେ।
