ଅତାବିରା, ୧୬।୧୨ (ଡି.ଏନ୍.ଏ.)- ସରକାର ଗରିବ୍ ଦୁଖିକର ଲାଗି ଅନେକ ଯୋଜନା କାଯ୍କାରୀ କରୁଛନ୍। ହେଲେ ଯୋଜନାକେ କାଯ୍କାରୀ କରୁଥିବାର ଅଧ୍କାରୀ, କରମ୍ଚାରୀକଁର ଅଁାତରିକତା ଅଭାବୁ ଅନେକ ଲୋକ୍ ଯୋଜନାର ସୁଫଲ ପାଏବାରୁ ବଁଚିତ୍ ହେଉଛନ୍। ଏନ୍ତା କି ସେମାନେ ମଲା ସମିଆ ତକ୍ ସରକାରୀ ସୁବିଧାରୁ ବଁଚିତ୍ ରହୁଛନ୍। ଏନ୍ତା ଗୁଟେ ତାଜା ଉଦାହରନ୍ ଦେଖ୍ବାକେ ମିଲିଛେ ବରଗଡ଼ ଜିଲା ଭେଡ଼େନ ବ୍ଲକ ଦେଶଭଟିଲି ପଁଚେତ୍ରେ।
ସୂଚନା ହିସାବେ ଦେଶଭଟିଲି ପଁଚେତ୍ ଉଦେପୁର ଗଁାର ହେମ ଦନ୍ତା(୮୦)। ଆପ୍ନେ ଅନେକ ବଛର ହେଲା ଆରପାରକେ ଚାଲିଯାଇଛନ୍। ସେନ୍ତା ବଏସ୍ ଅଧ୍କା ଲାଗି ହେମ ବି ଠିକ୍ସେ ଚାଲବୁଲ କରି ନାଇଁ ପାରୁଥାଇ। ହେଲେ ସେ ସରକାରକଁର ଭତା ଯୋଜନାରୁ ବଁଚିତ୍ ହେଇ ରହିଥିଲେ। ଇ ବାବ୍ଦେ ଅକ୍ଟୋବର ମାସେ ଧରିତ୍ରୀ ସମ୍ବଲପୁର ସଂସ୍କରଣରେ ଟିକିନିଖିନୁ ଖବର ବାହାରିଥିଲା। ଖବର ବାହାରଲାରୁ ଭେଡ଼େନ ବ୍ଲକ ବିଡିଓ ମୁରଲୀଧର ନାୟକକଁର ନିରଦେଶରେ ପଁଚେତ୍ କତୁରପକ୍ଷ ହେମକୁଁ ଭତା ଯୁଗେଇ ଦେବାର ଲାଗି ପଦକ୍ଷେପ ନେଇଥିଲେ। ହେଲେ ଏହେଦେ ବୁରୁଧ୍ ହେମକଁର ଦିହିପା ବହୁତ୍ ଖରାପ ଅଛେ। ସେ ଖଟେ ପଡ଼ି ରହିଛନ୍। ଦେଖି ନାଇଁ ପାରବାର କି ଶୁନି ନାଇଁପାରବାର। ଘରର ଲୋକ୍ ନାକ୍ବାଟେ ପାଇପ୍ରେ ତରଲ ଖାଏଦ୍ ଦେଉଛନ୍। ଗୁଟେପରକାର ଏହେଦେ ସେ ଜୀବନ୍ ମରନ୍ ସଂଗେ ଯୁଝୁଛନ୍। କେତେବେଲେ କାଣା ହେବା କିଛି କହି ନାଇଁ ହେବାର। ଇ ସମିଆରେ ରଏବାର ବିଭାଗୀୟ କରମ୍ଚାରୀମାନେ ହେମକଁର ଘରେ ପୁହୁଁଚି ତାହାକୁ ନଭେମ୍ବର ମାସର ୫ଶହ ଟଁକା ଭତା ଆର ପାସ୍ ବହି ଦେଇଛନ୍।
