ଟିଟିଲାଗଡ଼, ୫।୬(ଡି.ଏନ୍.ଏ.): ବଲାଙ୍ଗୀର ଜିଲା ଟିଟିଲାଗଡ଼ଠାରେ ଲିଙ୍ଗମପାଲିରୁ ବଲାଙ୍ଗୀର ଯାଉଥିବା ଶ୍ରମିକ ଟ୍ରେନରେ ଜଣେ ପ୍ରବାସୀ ମହିଳା ଶୁକ୍ରବାର ଏକ ଶିଶୁପୁତ୍ରକୁ ଜନ୍ମ ଦେଇଛନ୍ତି। ଉଭୟ ମା’ ଓ ସନ୍ତାନ ସୁସ୍ଥ ଥିବା ଡାକ୍ତର କହିଛନ୍ତି।
ସୂଚନାନୁଯାୟୀ, ଜିଲାର ବେଳପଡା ଅଞ୍ଚଳର ପିଣ୍ଡୁର ଛୁରା ଓ ତାଙ୍କ ସ୍ତ୍ରୀ ମିନା କୁମାରୀ ତେଲେଙ୍ଗାନାର ଲିଙ୍ଗମପାଲିରେ ଇଟାଭାଟିରେ କାମ କରୁଥିଲେ। ସେଠାରୁ ବଲାଙ୍ଗୀରକୁ ଫେରୁଥିବା ବେଳେ ପୂର୍ବାହ୍ନରେ ମିନା ଏକ ପୁତ୍ର ସନ୍ତାନକୁ ଜନ୍ମ ଦେଇଛନ୍ତି । ଖବରପାଇ ରେଳବିଭାଗ ଡାକ୍ତର ରଘୁନାଥ ପଣ୍ଡା ଷ୍ଟେଶନରେ ପହଞ୍ଚିଥିଲେ। ସେ ଉଭୟ ମା ଓ ଛୁଆର ସ୍ବାସ୍ଥ୍ୟ ପରୀକ୍ଷା କରିଥିଲେ। ତେବେ ସେମାନେ ସୁସ୍ଥ ଥିବା ଡାକ୍ତର କହିଛନ୍ତି। ପରେ ଆମ୍ବୁଲାନ୍ସ ଯୋଗେ ତାଙ୍କୁ ଟିଟିଲାଗଡ଼ ଉପଖଣ୍ଡ ଡାକ୍ତରଖାନାକୁ ପଠାଇ ଦିଆଯାଇଛି। ଷ୍ଟେସନ ପ୍ରବନ୍ଧକ ଶଙ୍କର ଚକ୍ରବର୍ତ୍ତୀ, ଆର.ପି.ଏଫ ଇନ୍ସପେକ୍ଟର ଏମ୍. ଏସ୍. କୋମାବତ, ଜି.ଆର.ପି ଏସ୍ଆଇ ସି ତିର୍କୀ, ଆର୍ପିଏଫ୍ ଏଏସ୍ଆଇ ପି.ସି ପଟ୍ଟନାୟକ, ପ୍ରଦୀପ କୁମାର, ସୁକଦେବ ବହିରା ଏବଂ ରେଳ ସ୍ବାସ୍ଥ୍ୟ ନିରୀକ୍ଷକ ସି.ଏନ୍ ରାଓ ପ୍ରମୁଖ ସହଯୋଗ କରିଥିଲେ ।
