ବାରିପଦା ଅଫିସ, ୩୦ା୪- ରାସ୍ତା କାର୍ଯ୍ୟ କରୁଥିବା ଶ୍ରମିକଙ୍କୁ ଧମକ ଦେବା ଓ ମାଡ଼ ମାରିବା ଅଭିଯୋଗରେ ପୋଲିସ ୪ ଜଣଙ୍କୁ ଗିରଫ କରିଛି। ଅଭିଯୁକ୍ତମାନେ ହେଲେ କୁଳିଆଣା ଥାନା କାମତା ଗ୍ରାମର ଶିବପ୍ରସାଦ ବାରିକ, ସଂଗ୍ରାମ କେଶରୀ ବେହେରା, ଶୁଭମ ଦାସଅଧିକାରୀ ଓ ଶ୍ରୀତମ ଦାସଅଧିକାରୀ। ଏନେଇ ପୋଲିସ ଏକ ମାମଲା(ନଂ.୫୦/୨୦୨୦) ରୁଜୁ କରି ତଦନ୍ତ ଜାରି ରଖିଛି।
ପୋଲିସ ସୂଚନା ଅନୁଯାୟୀ, ବୁଧବାର ଅପରାହ୍ନ ୩ଟା ସମୟରେ କାମତା ଗ୍ରାମ ଦେଇ ଯାଇଥିବା ଜାତୀୟ ରାଜପଥ ନଂ.୧୮ରେ ଶ୍ରମିକମାନେ କାମ କରୁଥିବା ବେଳେ ପ୍ରଥମେ ଶିବପ୍ରସାଦ ବାରିକ ଏକ ବାଇକ୍ରେ ଆସି ସେମାନଙ୍କୁ କାମ ବନ୍ଦ କରିବାକୁ ଧମକ ଦେବା ସହିତ ଗାଳି ଗୁଲଜ କରିଥିଲେ। ପରେ ତାଙ୍କର ଅନ୍ୟ ୩ ଜଣ ସହଯୋଗୀ ପହଞ୍ଚି ଶ୍ରମିକମାନଙ୍କୁ ଗାଳିଗୁଲଜ କରିବା ସହିତ ମାଡ଼ ମାରିବାରୁ ୩ ଶ୍ରମିକ ଆହତ ହୋଇଥିଲେ। ଫଳରେ ଭୟଭୀତ ହୋଇ ଶ୍ରମିକମାନେ କାମ ଛାଡ଼ି ସେଠାରୁ ପଳାଇ ଯାଇଥିଲେ। ଏନେଇ ଜଣେ ଶ୍ରମିକ କୁଳିଅଣା ଥାନାରେ ଅଭିଯୋଗ କରିଥିଲେ। ପୋଲିସ ଘଟଣାର ତଦନ୍ତ କରି ଅଭିଯୁକ୍ତମାନଙ୍କୁ ଗିରଫ କରିଥିଲା। ଅଭିଯୁକ୍ତମାନଙ୍କଠାରୁ ପୋଲିସ ଏକ ବାଇକ୍, ପ୍ଲାଷ୍ଟିକ୍ ପାଇପ୍ ଓ ଲାଠି ଜବତ କରିଛି। ଗୁରୁବାର ଅଭିଯୁକ୍ତ ୪ ଜଣଙ୍କୁ କୋର୍ଟ ଚାଲାଣ କରାଯାଇଥିବା ଏସ୍ପି ପରମାର ସ୍ମିଥ ପୁରୁଷୋତ୍ତମ ଦାସ ଏକ ପ୍ରେସ୍ ବିବୃତିରେ ସୂଚନା ଦେଇଛନ୍ତି।
