ଶେରଗଡ଼/ସୋରଡ଼ା,୧୩ା୬(ଡି.ଏନ୍.ଏ.): ଗଞ୍ଜାମ ଜିଲା ସୋରଡ଼ା ବ୍ଲକ ବଡ଼ଗଡ଼ ଥାନା ବାରଭରଣିଆ ଗ୍ରାମରେ ଶନିବାର ଏକ ଅଭାବନୀୟ ଘଟଣା ଘଟିଛି। ବାପ-ପୁଅଙ୍କ ଗଣ୍ଡଗୋଳରେ ବଳି ପଡ଼ିଛନ୍ତି ବୋହୂ। ସ୍ବାମୀଙ୍କୁ ବଞ୍ଚାଇବାକୁ ଯାଇ ଶ୍ୱଶୁରଙ୍କ ଗୁଳିମାଡ଼ରେ ମୃତ୍ୟୁ ଘଟିଛି ନବବିବାହିତାଙ୍କର। ମୃତକ ହେଲେ ସୋରଡ଼ା ଥାନା ଅଞ୍ଚଳର ରଶ୍ମିତା ମଲ୍ଲିକ। ଘଟଣା ପରେ ଶ୍ୱଶୁର ଫେରାର ହୋଇଯାଇଛନ୍ତି।
ବାରଭରଣିଆ ଗ୍ରାମ ପ୍ରଫୁଲ ମଲ୍ଲିକଙ୍କ ପୁଅ ମିଟୁ ୩ ମାସ ତଳେ ସୋରଡ଼ା ଥାନା ଅଞ୍ଚଳର ରଶ୍ମିତାଙ୍କୁ ବିବାହ କରିଥିଲେ। ପୁଅ ବାହାଘର ପାଇଁ ବାପା ପ୍ରଫୁଲ୍ଲ ୫୦ ହଜାର ଟଙ୍କା କରଜ କରିଥିଲେ। ଉକ୍ତ ଟଙ୍କା ଶୁଝିବାକୁ ନେଇ ବାପ-ପୁଅଙ୍କ ମଧ୍ୟରେ ମାସେ ହେଲା ପାଟିତୁଣ୍ଡ ହେଉଥିଲା। ଶନିବାର ପୂର୍ବାହ୍ନରେ କରଜ ଦେଇଥିବା ବ୍ୟକ୍ତି ଆସି ପ୍ରଫୁଲ୍ଲଙ୍କୁ ଟଙ୍କା ମାଗିଥିଲେ। ପ୍ରଫୁଲ୍ଲ ପୁଅ ମିଟୁଙ୍କୁ ଯାଇ ଟଙ୍କା ଦେବାକୁ କହିଥିଲେ। ମାତ୍ର ମିଟୁ ଦେବେନାହିଁ ବୋଲି ମନା କରିବାରୁ ବାପ-ପୁଅଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ପ୍ରପୁଲ୍ଲ ରାଗିଯାଇ ଘରେ ଥିବା ଏକ ଦେଶୀ ବନ୍ଧୁକ ଆଣି ପୁଅ ମିଟୁଙ୍କ ଉପରକୁ ଗୁଳି ଚଳାଇଥିଲେ। ପାଖରେ ଥିବା ରଶ୍ମିତା ସ୍ବାମୀଙ୍କୁ ବଞ୍ଚାଇବାକୁ ଯାଇ ଆଗକୁ ଆସିଯିବାରୁ ତାଙ୍କ ମୁଣ୍ଡରେ ଗୁଳି ବାଜିଥିଲା। ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ଏହାପରେ ପ୍ରଫୁଲ୍ଲ ବନ୍ଧୁକ ଫିଙ୍ଗି ଗ୍ରାମ ନିକଟ ଜଙ୍ଗଲ ମଧ୍ୟକୁ ଦୌଡ଼ି ପଳାଇଥିଲେ। ଖବରପାଇ ଆସିକା ଏସ୍ଡିପିଓ ସୂର୍ଯ୍ୟମଣି ପ୍ରଧାନ, ବଡ଼ଗଡ଼ ଥାନାଧିକାରୀ ପ୍ରତାପ ଚନ୍ଦ୍ର ତ୍ରିପାଠୀ ଗଁାରେ ପହଞ୍ଚତ୍ ମୃତଦେହ ଓ ବନ୍ଧୁକ ଜବତ କରିବା ସହ ତଦନ୍ତ ଚଳାଇଛନ୍ତି। ପୋଲିସ ଟିମ୍ ଜଙ୍ଗଲ ମଧ୍ୟରେ ପ୍ରଫୁଲ୍ଲଙ୍କୁ ଖୋଜାଖୋଜି କରୁଛି।
