ଲଣ୍ଡନ,୧୬।୧୨- ବିବିସି ସ୍ପୋଟର୍ସ ପର୍ସନାଲିଟି ଅଫ୍ ଦ ଇୟର ପୁରସ୍କାରରେ ଇଂଲଣ୍ଡ କ୍ରିକେଟ ହ୍ୟାଟ୍ରିକ କରିଛି। ବିଶ୍ୱକପ୍ ଚାମ୍ପିୟନ ଇଂଲଣ୍ଡକୁ ବର୍ଷର ଶ୍ରେଷ୍ଠ ଦଳ ଓ ମ୍ୟାନ୍ ଅଫ୍ ଦ ଫାଇନାଲ୍ ଭାବେ ବେନ୍ ଷ୍ଟୋକ୍ସଙ୍କୁ ବର୍ଷର ଶ୍ରେଷ୍ଠ କ୍ରୀଡ଼ା ବ୍ୟକ୍ତିତ୍ୱ ପୁରସ୍କାର ମିଳିଛି। ବିଶ୍ୱକପ୍ ଫାଇନାଲରେ ମାର୍ଟିନ ଗୁପ୍ଟିଲଙ୍କ ଦ୍ୱାରା ଜୋସ୍ ବଟଲର ରନ୍ଆଉଟ୍ ହେବା ସମୟକୁ ଚଳିତବର୍ଷ କ୍ରୀଡ଼ାର ଶ୍ରେଷ୍ଠ ମୁହୂର୍ତ୍ତ ଭାବେ ଚୟନ କରାଯାଇଛି।
ମୁଖ୍ୟ କ୍ରୀଡ଼ା ବ୍ୟକ୍ତିତ୍ୱ ପୁରସ୍କାର ପାଇଁ ବର୍ଷରେ କେଉଁ ଖେଳାଳିଙ୍କ ପ୍ରଦର୍ଶନ ସବୁଠୁ ଆକର୍ଷଣୀୟ ଥିଲା, ତାହା କ୍ରିକେଟ ପ୍ରଶଂସକଙ୍କ ଦ୍ୱାରା ଚୟନ କରାଯାଏ। ପୂର୍ବରୁ ଟେନିସ୍ ଖେଳାଳି ଆଣ୍ଡି ମୁରେ, ଜନି ଓ୍ବିକିନ୍ସନ ଓ ଷ୍ଟିଭ ରେଡ୍ଗ୍ରଭେଙ୍କୁ ଏହି ପୁରସ୍କାର ମିଳିଥିଲା। ଚଳିତବର୍ଷ ଫର୍ମୁଲା ଓ୍ବାନ୍ ଷ୍ଟାର ଲୁଇସ୍ ହାମିଲଟନ ଓ ଆଥ୍ଲେଟ ଡାଇନା ଆଶର ସ୍ମିଥ୍ଙ୍କୁ ପଛରେ ପକାଇ ଷ୍ଟୋକ୍ସ ଏହି ସଫଳତା ପାଇଛନ୍ତି। ଉଲ୍ଲେଖଥାଉ କି, ଷ୍ଟୋକ୍ସଙ୍କ ଯୋଗୁ ବିଶ୍ୱକପ୍ ଫାଇନାଲ ସୁପର ଓଭରରେ ଦଳ ପ୍ରବେଶ କରିଥିଲା। ଏହାର ମାସକ ପରେ ତାଙ୍କ ଚମତ୍କାର ପ୍ରଦର୍ଶନ ବଳରେ ଆଶେସ୍ ସିରିଜ୍କୁ ଇଂଲଣ୍ଡ ଡ୍ର’ ରଖିପାରିଥିଲା।
