ମୁମ୍ବାଇ, ୨୪ା୧୧(ପି.ଟି.) : ମହାରାଷ୍ଟ୍ରରେ ଦେବେନ୍ଦ୍ର ଫଡ୍ନବିସ୍ ମୁଖ୍ୟମନ୍ତ୍ରୀ ଭାବେ ଶପଥଗ୍ରହଣ କରିଥିଲେ ହେଁ ଆବଶ୍ୟକ ସଂଖ୍ୟା ଭାଜପା ପାଖରେ ନାହିଁ ବୋଲି ଏନ୍ସିପି ମୁଖ୍ୟ ଶରଦ ପାଓ୍ବାର ଶନିବାର କହିଛନ୍ତି। ଭାଜପାକୁ ଅଜିତ୍ ସମର୍ଥନ କରିବା ନିଷ୍ପତ୍ତି ସମ୍ପୂର୍ଣ୍ଣ ଅନୁଶାସନହୀନତା ବୋଲି ସେ ମତ ଦେଇଛନ୍ତି। ଏନ୍ସିପି-ଭାଜପା ମେଣ୍ଟ ସପକ୍ଷରେ ଦଳର କୌଣସି ନେତା ନାହାନ୍ତି। ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ଏନ୍ସିପି ନେତା ଅଜିତ୍ ପାଓ୍ବାରଙ୍କ ସହ ୧୦ରୁ ୧୧ ବିଧାୟକ ରହିଛନ୍ତି। ଭାଜପା ପାଖରେ ଆବଶ୍ୟକ ସଂଖ୍ୟା ନ ଥିବାରୁ ସରକାର ତିଷ୍ଠିରହିବା ମୁସ୍କିଲ ବୋଲି ଶରଦ ପ୍ରକାଶ କରିଛନ୍ତି। ଶିବସେନା ମୁଖ୍ୟ ଉଦ୍ଧବ ଠାକ୍ରେଙ୍କ ସହ ମିଳିତ ଖବରଦାତା ସମ୍ମିଳନୀକୁ ଉଦ୍ବୋଧନ ଦେବା ଅବସରରେ ଶରଦ ଏଭଳି ଦୃଢୋକ୍ତି ପ୍ରକାଶ କରିଛନ୍ତି। ଏଥିସହ ଅପରାହ୍ନରେ ଅଜିତ୍ଙ୍କୁ ଏନ୍ସିପି ବିଧାୟକ ଦଳ ନେତା ପଦରୁ ବିଦା କରାଯାଇଛି। ଭାଜପା-ଏନ୍ସିପି ସହଯୋଗରେ ସରକାର ଗଠନ କରାଯିବାକୁ ଉଦ୍ଧବ ରାତି ଅଧିଆ ସର୍ଜିକାଲ୍ ଷ୍ଟ୍ରାଇକ୍ ବୋଲି କହିଛନ୍ତି। ପୂର୍ବରୁ ଏନ୍ସିପି ମୁଖ୍ୟ ଶରଦ ପାଓ୍ବାର ଭାଜପା ସହ ଅଜିତ୍ଙ୍କ ସମ୍ପର୍କ ବ୍ୟକ୍ତିଗତ ଓ ଦଳର ଏଥିରେ କିଛି ନାହିଁ ବୋଲି ସ୍ପଷ୍ଟ କରିଥିଲେ।
