ନୂଆଦିଲ୍ଲୀ,୨୨।୭- ଆଇସିସି ବିଶ୍ୱକପ୍ରେ ସର୍ବାଧିକ ରନ୍ଠାରୁ ଆରମ୍ଭ କରି ସର୍ବାଧିକ ସଂଖ୍ୟକ ଶତକ ଲଗାଇବାର ରେକର୍ଡ କିମ୍ବଦନ୍ତୀ ବ୍ୟାଟ୍ସମ୍ୟାନ ସଚିନ ତେନ୍ଦୁଲକରଙ୍କ ନାମରେ ରହିଛି। ଏହାଛଡ଼ା ତାଙ୍କ ନାମରେ ବିଶ୍ୱକପ୍ ଇତିହାସରେ ସର୍ବାଧିକ ଥର ମ୍ୟାନ୍ ଅଫ୍ ଦି ମ୍ୟାଚ୍ ଭାବେ ପୁରସ୍କୃତ ହେବାର ରେକର୍ଡ। ବିଶ୍ୱକପ୍ର ୬ଟି ସଂସ୍କରଣରେ ଭାରତ ପାଇଁ ଖେଳିଥିବା ସଚିନ ସର୍ବାଧିକ ୯ ଥର ମ୍ୟାନ୍ ଅଫ୍ ଦି ମ୍ୟାଚ୍ ଭାବେ ବିବେଚିତ ହାଇଥିଲେ। ୧୯୯୨ ଓ ୧୯୯୬ ଦୁଇ ଥର ଲେଖାଏ ଏବଂ ୨୦୦୩ରେ ସର୍ବାଧିକ ୩ ଥର ମାଷ୍ଟର ବ୍ଲାଷ୍ଟର ମ୍ୟାନ୍ ଅଫ୍ ଦି ମ୍ୟାଚ୍ ହେବାର ସୌଭାଗ୍ୟ ଲାଭ କରିିଥିଲେ। ଏହାବାଦ୍ ୧୯୯୯ ଓ ୨୦୧୧ରେ ମାତ୍ର ଥରେ ଶ୍ରେଷ୍ଠ ଖେଳାଳି ହୋଇପାରିଥିଲେ। ତାଙ୍କ ପଛକୁ ଅଷ୍ଟ୍ରେଲିଆର ପୂର୍ବତନ ପେସର ଗ୍ଲେନ ମ୍ୟାକଗ୍ରାଥ ରହିଛନ୍ତି। ମ୍ୟାକଗ୍ରାଥ ୬ ଥର ମ୍ୟାଚ୍ର ଶ୍ରେଷ୍ଠ ଖେଳାଳି ବିବେଚିତ ହୋଇଛନ୍ତି। ଦୁଇଙ୍କ ପଛକୁ ୫ ଜଣ କ୍ରିକେଟର ସମାନ ସଂଖ୍ୟକ ମ୍ୟାନ୍ ଅଫ୍ ଦି ମ୍ୟାଚ୍ ପୁରସ୍କାର ହାତେଇଛନ୍ତି। ଏହି ତାଲିକାରେ ଦକ୍ଷିଣ ଆଫ୍ରିକାର ଏବି ଡି’ଭିଲୟର୍ସ, ଲାନ୍ସ କ୍ଲୁଜନର, ଶ୍ରୀଲଙ୍କାର ସନଥ ଜୟସୁରିୟା, ଇଂଲଣ୍ଡର ଗ୍ରାହମ ଗୁଚ ଓ ଓ୍ବେଷ୍ଟଇଣ୍ଡିଜର ଭିଭିଆନ ରିଚାଡର୍ସ ଭଳି ପୂର୍ବତନ କ୍ରିକେଟର ରହିଛନ୍ତି।
