ନୟାଗଡ଼ ଅଫିସ,୨୭ା୮: ସପ୍ତମ ଆର୍ଥିକ ଜନଗଣନା (ଇକୋନୋମିକ ସେନ୍ସସ୍) କାର୍ଯ୍ୟକ୍ରମ ସୋମବାର ଆରମ୍ଭ ହୋଇଛି। ଜିଲାପାଳଙ୍କ ସଦ୍ଭାବନା ଗୃହଠାରେ ଜିଲାପାଳ ଡ. ପୋମା ଟୁଡୁ ଏହାକୁ ଉଦ୍ଘାଟନ କରିଥିଲେ। କାର୍ଯ୍ୟକ୍ରମର ମଧ୍ୟାନ୍ତର ସମୟରେ ଏହାର ରିପୋର୍ଟ ଦେବା ପାଇଁ ସେ ଜନସେବା କେନ୍ଦ୍ର (ସିଏସସି)ର ଅଧିକାରୀମାନଙ୍କୁ କହିଥିଲେ। ସୂଚନାଯୋଗ୍ୟ ପୂର୍ବରୁ ଶିକ୍ଷକମାନେ ଏହି ଗଣନା କାର୍ଯ୍ୟ କରୁଥିବା ବେଳେ ଏଥର କିନ୍ତୁ ସେମାନଙ୍କୁ ବିରତି ଦିଆଯାଇ ଜନସେବା କେନ୍ଦ୍ର କର୍ମଚାରୀମାନଙ୍କୁ ଏହି ଦାୟିତ୍ୱ ଦିଆଯାଇଛି। ଜନସେବା କେନ୍ଦ୍ରରେ ଥିବା ସୁପରଭାଇଜର ଓ ଗଣନାକାରୀମାନେ ମୋବାଇଲ୍ ଆପ୍ଲିକେସନ୍ ମାଧ୍ୟମରେ ଏହି ଗଣନା କାର୍ଯ୍ୟକ୍ରମ କରିବେ। ୭ଦିନ ମଧ୍ୟରେ ଜିଲାରେ ଏହି କାର୍ଯ୍ୟକ୍ରମ ଆରମ୍ଭ ହେବ ଓ ୩ମାସ ଧରି ଚାଲିବ। ସୁପରଭାଇଜର ଓ ଗଣନକାରୀମାନେ ଘର ଓ ବିଭିନ୍ନ ପ୍ରତିଷ୍ଠାନ ବୁଲି ଲୋକମାନଙ୍କଠାରୁ ତଥ୍ୟ ସଂଗ୍ରହ କରିବେ। ସେମାନଙ୍କର ନାମ, କେଉଁ ସଂସ୍ଥାରେ କ’ଣ କାମ କରୁଛନ୍ତି ଓ ଆର୍ଥିକ ସ୍ଥିତି ଆଦି ବିଷୟରେ ତଥ୍ୟ ସଂଗ୍ରହ କରିବେ। ଏହା ପରେ ଉକ୍ତ ତଥ୍ୟ କେନ୍ଦ୍ରକୁ ପଠାଯିବ ବୋଲି ସୂଚନା ଦିଆଯାଇଥିଲା। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଗଣନା ଅଧିକାରୀ ତପନ କୁମାର ମିଶ୍ର, ସହକାରୀ ନିର୍ଦ୍ଦେଶକ ଶଙ୍କର ବେହେରା, ଡ଼େପୁଟି ନିର୍ଦ୍ଦେଶକ ତାରା ପ୍ରସାଦ ପଟ୍ଟନାୟକ, ଜନସେବା କେନ୍ଦ୍ରର ଜିଲା ପରିଚାଳକ ଆଶୁତୋଷ ଶତପଥୀ, ସୁବାସ ଚନ୍ଦ୍ର ପରିଡ଼ା, ଜିଲା ସଂଯୋଜକ ହିମାଂଶୁ ଶେଖର ସାମଲ ପ୍ରମୁଖ ଉପସ୍ଥିତ ଥିଲେ। ଏ ନେଇ କୌଣସି ସମସ୍ୟା ଦେଖାଦେଲେ ୧୮୦୦-୩୦୦୦-୩୪୬୮ ଟୋଲ୍ ଫ୍ରି ନମ୍ବରରେ କଲ୍ କରିବା ପାଇଁ ସୂଚନା ଦିଆଯାଇଥିଲା।
