ନୂଆଦିଲ୍ଲୀ,୮।୫: କୋଭିଡ୍-୧୯ ଯୋଗୁ କ୍ଷତିଗ୍ରସ୍ତ ହୋଇଥିବା ବିଭିନ୍ନ କ୍ଷେତ୍ରକୁ ସରକାର ପ୍ୟାକେଜ ପ୍ରଦାନ କରିବେ। ଏ ନେଇ ବର୍ତ୍ତମାନ ବିଚାର ହେଉଥିବା ବେଳେ ଶୀଘ୍ର ଘୋଷଣା କରାଯିବ ବୋଲି କେନ୍ଦ୍ର ଏମ୍ଏସ୍ଏମ୍ଇ ମନ୍ତ୍ରୀ ନୀତିନ ଗଡକରୀ ସୂଚନା ଦେଇଛନ୍ତି। ସେ କହିଛନ୍ତି ଯେ, କେବଳ ଦେଶର ଅଣୁ କ୍ଷୁଦ୍ର ମଧ୍ୟ ଉଦ୍ୟୋଗ(ଏମ୍ଏସ୍ଏମ୍ଇ)କୁ ପ୍ୟାକେଜ ପ୍ରଦାନ ନେଇ ଯୋଜନା ନାହିଁ। ଯୋଜନାରେ ସବୁ କ୍ଷେତ୍ରକୁ ସାମିଲ କରାଯିବ। ଅର୍ଥ ବ୍ୟବସ୍ଥାକୁ ତ୍ୱରାନ୍ବିତ କରିବା ଲାଗି ସରକାର ପ୍ୟାଜେକ ଘୋଷଣା କରନ୍ତୁ ବୋଲି ଦାବି ହୋଇ ଆସୁଛି। ଦେଶର ଅଭିବୃଦ୍ଧି କ୍ଷେତ୍ରରେ ଏମ୍ଏସ୍ଏମ୍ଇ କ୍ଷେତ୍ରର ଯୋଗଦାନ ୨୯% ରହିଛି। ସେହିଭଳି ଏମ୍ଏସ୍ଏମ୍ଇ ରପ୍ତାନି କ୍ଷେତ୍ରକୁ ୪୮% ଅଂଶୀଦାର ରହିଛି। ରୋଜଗାର ପ୍ରଦାନ କ୍ଷେତ୍ରରେ ଏହି କ୍ଷେତ୍ରର ଉଲ୍ଲେଖନୀୟ ଭୂମିକା ରହିଛି। ହେଲେ କୋଭିଡ୍ କମ୍ପାନୀଗୁଡିକର ଅଣ୍ଟା ଭାଙ୍ଗି ଦେଇଛି। ଲକ୍ଡାଉନ ଯୋଗୁ ଅନେକ ଦିନ ଧରି କମ୍ପାନୀଗୁଡିକ ବନ୍ଦ ହୋଇ ପଡିଲାଣି। ଲକ୍ଡାଉନ ପରେ ମଧ୍ୟ ସ୍ଥିତି ସ୍ବାଭାବିତ ହେବ ନାହିଁ ବୋଲି ବଜାର ବିଶେଷଜ୍ଞମାନେ ମତ ପ୍ରକାଶ କରିଛନ୍ତି। ଏଭଳି ବିଭିନ୍ନ ସ୍ଥିତିକୁ ସରକାର ଏବେ ବିଚାରକରି ପ୍ୟାକେଜ ଘୋଷଣା କରିବାକୁ ଯୋଜନା ରଖିଛନ୍ତି।
