କୁଜଙ୍ଗ,୧୭ା୨(ଡି.ଏନ.ଏ.): ଯୁବକଙ୍କ ଅଦମ୍ୟ ଇଚ୍ଛାଶକ୍ତି ଆମକୁ ଆଜି ପ୍ରଗତିର ଶିଖରରେ ପହଞ୍ଚାଇଛି। ରାଜନୀତି ଆଜି ସମାଜକୁ ଭାଗଭାଗ କରୁଥିବାବେଳେ, କ୍ରୀଡ଼ା ଓ ସଂସ୍କୃତି ଆମକୁ ଗୋଟିଏ ସୂତ୍ରରେ ବାନ୍ଧି ପାରୁଛି। କ୍ରୀଡ଼ାବିନା ଆମର ଶାରିରୀକ ଓ ମାନସିକ ବିକାଶ ଅସମ୍ଭବ। କ୍ରୀଡ଼ା ହିଁ ଯୁବକମାନଙ୍କୁ ଏକାଠି ରଖିବା ସାଙ୍ଗକୁ ସମାଜ ସଂସ୍କାରରେ ବ୍ରତୀ ହେବାକୁ ପ୍ରେରଣା ଯୋଗାଏ। ସମାଜରେ ଘଟୁଥିବା ଦୁର୍ନୀତି ବ୍ୟଭିଚାରକୁ କେବଳ ଯୁବକମାନେ ଚାହିଁଲେ ହଟାଇ ଦେଇପାରିବେ। ତେଣୁ ଯୁବକମାନେ ସମାଜ ସଂସ୍କାରରେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ ପାଇଁ ଆଗେଇ ଆସିବାକୁ ପାରାଦୀପ ବିଧାୟକ ସମ୍ବିତ ରାଉତରାୟ ଆହ୍ବାନ କରିଛନ୍ତି। ରବିବାର ସନ୍ଧ୍ୟାରେ କୁଜଙ୍ଗ ବ୍ଲକ ପାଟପୁର ପଞ୍ଚାୟତ ବାଲିପାରି ଗ୍ରାମର ମା’ବୁଢୀକେନ୍ଦୁଳାଇ ଯୁବ ପରିଷଦ ପକ୍ଷରୁ ଅନୁଷ୍ଠିତ ୫୯ତମ ଜାନୁୟାରୀ ୨୬ ବାର୍ଷିକ କ୍ରୀଡ଼ା ପ୍ରତିଯୋଗିତାର ପୁରସ୍କାର ବିତରଣ ଉତ୍ସବରେ ମୁଖ୍ୟ ଅତିଥିଭାବେ ବିଧାୟକ ରାଉତରାୟ ଯୋଗଦେଇ ଉପରୋକ୍ତ ଆହ୍ବାନ ଦେବାସହ ଆମ ସଂସ୍କୃତି ଓ ପରମ୍ପରା କିପରି ଉଜ୍ଜିବୀତ ରହିବ ସେଥିପ୍ରତି ଯତ୍ନଶୀଳ ହେବାକୁ ପରମର୍ଶ ଦେଇଥିଲେ। ପୂର୍ବତନ ବିଧାୟକ ସରୋଜ ପ୍ରଧାନଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉତ୍ସବରେ ସମ୍ମାନିତ ଅତିଥି ପୂର୍ବତନ ସରପଞ୍ଚ ବିଜୟ ଖଟେଇ, ଜିଲାପରିଷଦ ସଭ୍ୟା ନମିତା ପରିଡା, ସାମାଜିକ କର୍ମୀ ଶୁଭ୍ରକାନ୍ତ ସାମନ୍ତରାୟ ପ୍ରମୁଖ ଯୋଗ ଦେଇଥିଲେ। ଉତ୍ସବ ପରିଚାଳନା କରିଥିଲେ ରଶ୍ମିକାନ୍ତ ମହାପାତ୍ର, ଦିଲୀପ ବସ୍ତିଆ ଓ ସୁଧୀର ମହାପାତ୍ର। ଶେଷରେ କୃତୀ କ୍ରୀଡ଼ାବିତଙ୍କୁ ବିଧାୟକ ପୁରସ୍କାର ବିତରଣ କରିଥିଲେ।
