ଗାନ୍ଧୀନଗର,୧୫।୬: ସମୁଦ୍ର କୂଳରେ ଥିବା ଏକ ମନ୍ଦିର ନିକଟରେ ଗୋଟିଏ ପରିବାର ବସି ମଜାମସ୍ତି କରୁଥିଲେ। ସେହି ସମୟରେ ହଠାତ୍ ଏକ ଉଚ୍ଚ ଢ଼େଉ ଆସି ତାଙ୍କୁ ପାଣି ଭିତରକୁ ଟାଣିନେଇଥିଲା। ଏହି ଦୃଶ୍ୟ ଦେଖିବାକୁ ମିଳିଛି ଗୁଜରାଟର ପର୍ଯ୍ୟଟନସ୍ଥଳ କେନ୍ଦ୍ର ଶାସିତ ପ୍ରଦେଶ ଡିୟୁରେ। ସୂଚନାଯୋଗ୍ୟ, ଗୁଜୁରାଟରେ ପ୍ରଶାସନ ପକ୍ଷରୁ ବାତ୍ୟା ‘ବାୟୁ’ ପାଇଁ ଆଲର୍ଟ ଜାରି କରାଯାଇଥିଲା। ସମୁଦ୍ର କୂଳକୁ ପର୍ଯ୍ୟଟକ ଓ ମତ୍ସଜୀବୀଙ୍କୁ ଯିବା ପାଇଁ ବାରଣ କରାଯାଇଥିଲେ। ଡିୟୁରେ ଥିବା ଗଙ୍ଗେଶ୍ୱର ମହାଦେବ ମନ୍ଦିର ଏହା ସମୁଦ୍ର କୂଳରେ ଅବସ୍ଥିତ। ସମସ୍ତଙ୍କୁ ଆଲର୍ଟ କରାଯିବା ସତ୍ତ୍ୱେ ଗୋଟିଏ ପରିବାର ଉକ୍ତ ମନ୍ଦିରର ପାହାଚରେ ବସି ମଜା କରିବା ସହ ଭିଡିଓ କରୁଥିଲେ। ସେହି ସମୟରେ ହଠାତ୍ ସମୁଦ୍ରର ଢ଼େଉ ଆସି ତାଙ୍କୁ ପାଣି ଭିତରକୁ ଟାଣି ନେଇଥିଲା। ଢ଼େଉର ପ୍ରଖରତା ଏତେ ଅଧିକ ଥିଲା ଯେ ସେଠାରେ ସେମାନଙ୍କର ସନ୍ତୁଳନ ବିଗିଡ଼ି ଯାଇଥିଲା। ହେଲେ ଭାଗ୍ୟବଶତଃ ଲଗାତାର ଭାବେ ଢ଼େଉ ନ ଆସିବାରୁ ଉକ୍ତ ପରିବାର ପରସ୍ପରର ହାତ ଧରି ପାଣି ଭିତରୁ ବାହାରକୁ ଆସିବାରେ ସଫଳ ହୋଇଥିଲେ। ଏହି ଘଟଣାର ଭିଡିଓ ଏବେ ଭାଇରାଲ ହେବାରେ ଲାଗିଛି।
