ଗଞ୍ଜାମ,୨୫।୪(ଡି.ଏନ୍.ଏ.): ଗଞ୍ଜାମ ଜିଲା ଗଞ୍ଜାମ ବ୍ଲକ ଅନ୍ତର୍ଗତ ପୋଡ଼ମପେଟାରେ ସମୁଦ୍ରରେ ଡ଼ଙ୍ଗା ବୁଡିଯିବାରୁ ଜଣେ ମସ୍ୟଜୀବୀଙ୍କ ମୃତ୍ୟ ଘଟିଛି। ଅନ୍ୟ ୪ ମତ୍ସ୍ୟଜୀବୀ ପହଁରି ପହଁରି କୂଳକୁ ଫେରିଆସିଛନ୍ତି। ମୃତକ ହେଲେ ପୋଡ଼ମପେଟା ଗ୍ରାମର ସି.ଏଚ୍. ଦାନେୟା। ସୂଚନା ମୁତାକବ, ଶୁକ୍ରବାର ରାତିରେ ପୋଡ଼ମପେଟା ଗ୍ରାମର ୫ ମତ୍ସ୍ୟଜୀବୀ ମାଛ ମାରିବାକୁ ଡ଼ଙ୍ଗାଧରି ସମୁଦ୍ରକୁ ଯାଇଥିଲେ। ମାଛ ମାରିବା ବେଳେ ହଟାତ୍ ଡ଼ଙ୍ଗାଟି ସମୁଦ୍ରରେ ବୁଡି ଯାଇଥିଲା। ଡଙ୍ଗାରେ ଥିବା ୫ଜଣଙ୍କ ମଧ୍ୟରୁ ଚାରି ଜଣ ପାଣିରେ ପହଁରି ଚାଲିଆସିଥିବା ବେଳେ ଜଣେ ନିଖୋଜ ହୋଇଯାଇଥିଲେ। ଶନିବାର ସକାଳେ ପ୍ରୋୟୋଗୀ ନିକଟସ୍ଥ ସମୁଦ୍ରକୂଳରୁ ଦାନେୟାଙ୍କ ମୃତଦେହ ଉଦ୍ଧାର ହୋଇଛି। ଏ ନେଇ ସରପଞ୍ଚ ଦିଲ୍ଲୀପ କୁମାର ଛୋଟରାୟ ସୂଚନା ଦେଇଛନ୍ତି। ସମସ୍ତ ମତ୍ସ୍ୟଜୀବୀ ଅତ୍ୟନ୍ତ ଗରିବ ଶ୍ରେଣୀର ହୋଇଥିବାରୁ ସେମାନଙ୍କୁ ସରକାର ତଥା ଜିଲା ପ୍ରଶାସନ ପକ୍ଷରୁ ଆର୍ଥିକ ସହାୟତା ଦେବା ନିମନ୍ତେ ଦାବି ହେଉଛି।
