ଦିଗପହଣ୍ଡି,୨୭ା୪(ଡି.ଏନ.ଏ.)- ଦିଗପହଣ୍ଡି ବ୍ଲକ ନିମଖଣ୍ଡିପେଣ୍ଠ ଗ୍ରାମ ନିକଟରେ ଥିବା ସରକାରୀ ବାହାର ଦେଶୀମଦ ଭାଟିରେ ସୋମବାର ଦିଗପହଣ୍ଡି ଏକ୍ଜିକ୍ୟୁଟିଭ୍ ମାଜିଷ୍ଟ୍ରେଟ ତଥା ତହସିଲଦାର ଅଦ୍ୱୈତ କୁମାର ସ୍ବାଇଁ ପୋଲିସ ଟିମ୍ ସହ ଚଢାଉ କରି ଏହାକୁ ସମ୍ପୂର୍ଣ୍ଣ ସିଲ୍ କରିଛନ୍ତି। ଲକ୍ଡାଉନ ନିୟମକୁ ଉଲ୍ଲଘଂନ କରି ଏଠାରେ ବେଆଇନ ଭାବେ ମଦ ପାଉଚ ପ୍ରସ୍ତୁତ କରି ଚୋରା ଚାଲାଣ କରାଯାଉଥିବା ତହସିଲଦାର କହିଛନ୍ତି। ଗତ ବୁଧବାର ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ଏହି ଲାଇସେନ୍ସପ୍ରାପ୍ତ ସରକାରୀ ମଦଭାଟିକୁ ସ୍ଥାନୀୟ ଅବକାରୀ ବିଭାଗ ସିଲ୍ କରିଥିଲା। ସିଲ୍ ପରେ ମଧ୍ୟ ମଦ ପଛପଟ ଖୋଲି ମଦ ପ୍ରସ୍ତୁତ କରାଯାଉଥିବା ଖବର ପାଇ ଏନ୍ଫୋର୍ସମେଣ୍ଟ ସ୍କ୍ବାଡ୍ ଶୁକ୍ରବାର ଚଢାଉ କରିବାକୁ ଯାଉଥିବାବେଳେ ମଦଭାଟି କର୍ମଚାରୀ ଧମକ ଦେଇଥିଲେ। ସୋମବାର ତହସିଲଦାର ଚିକିଟି ଏସଡିପିଓ ସୁରେନ୍ଦ୍ର ନାଥ ମୁର୍ମୁ, ଦିଗପହଣ୍ଡି ଥାନାଅଧିକାରୀ ବସନ୍ତ କୁମାର ସେଠୀଙ୍କ ସହ ସଦଳବଳ ଚଢାଉ କରି ଏହାକୁ ସମ୍ପୂର୍ଣ୍ଣ ସିଲ୍ କରିବା ସହ ୩ କର୍ମଚାରୀଙ୍କୁ ଥାନାରେ ଅଟକ ରଖି ତଦନ୍ତ ଚଳାଇଛନ୍ତି।
