କାଠମାଣ୍ଡୁ, ୮ା୧୦ (ପି.ଟି.)-ଚଳିତ ସାଉଥ୍ ଏସିଆନ ଗେମ୍ସର ୬ଷ୍ଠ ଦିବସରେ ଭାରତ ସନ୍ତରଣ ଏବଂ କୁସ୍ତି ପ୍ରତିଯୋଗିତାରେ ପ୍ରଭାବୀ ପ୍ରଦର୍ଶନ କରିଥିବାବେଳେ ୪୯ଟି ପଦକ ଲାଭ କରିଛି। ତନ୍ମଧ୍ୟରେ ୨୯ଟି ସ୍ବର୍ଣ୍ଣ ପଦକ ରହିଛି। ଭାରତର ମୋଟ ପଦକ ସଂଖ୍ୟା ୨୧୪(୧୧୦ ସ୍ବର୍ଣ୍ଣ, ୬୯ ରୌପ୍ୟ, ୩୫ ବ୍ରୋଞ୍ଜ)ରେ ପହଞ୍ଚିଛି। ପଦକ ତାଲିକାର ଦ୍ୱିତୀୟ ସ୍ଥାନରେ ରହିଥିବା ନେପାଳର ପଦକ ସଂଖ୍ୟା ୧୪୨ (୪୩ ସ୍ବର୍ଣ୍ଣ, ୩୪ ରୌପ୍ୟ, ୬୫ ବ୍ରୋଞ୍ଜ) ରହିଛି। ଶ୍ରୀଲଙ୍କା ୧୭୦ ପଦକ (୩୦ ସ୍ବର୍ଣ୍ଣ, ୫୭ ରୌପ୍ୟ, ୮୩ ବ୍ରୋଞ୍ଜ) ସହ ତୃତୀୟ ସ୍ଥାନରେ ରହିଛି। ଶନିବାର ଭାରତର ସନ୍ତରଣକାରୀମାନେ ସମ୍ପୂର୍ଣ୍ଣ ପ୍ରାଧାନ୍ୟ
ବିସ୍ତାର କରି ୭ ସ୍ବର୍ଣ୍ଣ, ୧ ରୌପ୍ୟ ଏବଂ ୧ ବ୍ରୋଞ୍ଜ ଜିତିଛନ୍ତି। ଶ୍ରୀହରି ନଟରାଜ (୧୦୦ ମିଟର ବ୍ୟାକ୍ଷ୍ଟ୍ରୋକ୍) ରିଚା ମିଶ୍ର (୮୦୦ ମିଟର ଫ୍ରିଷ୍ଟାଇଲ), ସିଲ୍ଭା ଏସ୍ (୪୦୦ ମିଟର ବ୍ୟକ୍ତିଗତ ମିଡ୍ଲେ), ମାନ୍ନା ପଟେଲ (୧୦୦ ମିଟର ବ୍ୟାକ୍ଷ୍ଟ୍ରୋକ୍), ଚାହାତ ଆରୋରା (୫୦ ମିଟର ବ୍ୟାକ୍ଷ୍ଟ୍ରୋକ୍), ଲିଖିଥ ଏସପି (୫୦ ମିଟର ବ୍ୟାକ୍ଷ୍ଟ୍ରୋକ୍) ଏବଂ ରୁଜୁତା ଭଟ୍ଟ (୫୦ ମିଟର ଫ୍ରିଷ୍ଟାଇଲ) ପ୍ରମୁଖ ସ୍ବର୍ଣ୍ଣ ପଦକ ହାସଲ କରିଛନ୍ତି। ଏ.ଭି. ଜୟାଭିନା (୫୦ ମିଟର ବ୍ୟାକ୍ ଷ୍ଟ୍ରୋକ୍) ଏବଂ ରିଧିମା ବିରେନ୍ଦ୍ର କୁମାର (୧୦୦ ମିଟର ବ୍ୟାକ୍ଷ୍ଟ୍ରୋକ୍) ଯଥାକ୍ରମେ ରୌପ୍ୟ ଓ ବ୍ରୋଞ୍ଜ ଜିତିଛନ୍ତି। ଫଳରେ ସନ୍ତରଣରେ ଭାରତର ମୋଟ ପଦକ ସଂଖ୍ୟା ୩୦ରେ ପହଞ୍ଚତ୍ଛି। ପ୍ରଥମ ଦୁଇ ଦିନରେ ଭାରତୀୟ ସନ୍ତରଣକାରୀମାନେ ୨୧ ପଦକ ଜିତି ସାରିଥିଲେ।
ଅନ୍ୟପକ୍ଷରେ କୁସ୍ତି ପ୍ରତିଯୋଗିତାର ପ୍ରଥମ ଦିବସରେ ଭାରତୀୟ କୁସ୍ତିଯୋଦ୍ଧାମାନେ ୪ ସ୍ବର୍ଣ୍ଣ ଜିତିଛନ୍ତି। ସେମାନେ ହେଲେ ସତ୍ୟଓ୍ବର୍ତ କାଡିଆନ (ପୁରୁଷ ୯୭କେଜି ଫ୍ରିଷ୍ଟାଇଲ), ସୁମିତ ମଲିକ (ପୁରୁଷ ୧୨୫ କେଜି ଫ୍ରିଷ୍ଟାଇଲ), ଗୁରସରଣପ୍ରୀତ୍ କୌର (ମହିଳା ୭୬ କେଜି) ଏବଂ ସରିତା ମୋର୍)। ରାଜ୍ୟଗୋଷ୍ଠୀ କ୍ରୀଡ଼ା ରୌପ୍ୟ ବିଜେତା କାଡିଆନ ପାକିସ୍ତାନର ତାବିୟାର ଖାଁଙ୍କୁ ହରାଇ ଦେଇଥିବାବେଳେ ଜାତୀୟ ଚାମ୍ପିୟନ ଗୁର୍ଶାନ୍ପ୍ରୀତ ୭ ବର୍ଷ ପରେ ତାଙ୍କର ପ୍ରଥମ ଅନ୍ତର୍ଜାତୀୟ ପ୍ରତିଯୋଗିତାରେ ସ୍ବର୍ଣ୍ଣ ଜିତିଛନ୍ତି। ଭାରତୀୟ ଶୁଟରମାନେ ସେମାନଙ୍କ ପ୍ରଭାବୀ ପ୍ରଦର୍ଶନ ଜାରି ରଖିଛନ୍ତି। ଶନିବାର ସେମାନେ ୩ଟି ସ୍ବର୍ଣ୍ଣ ଜିତିଛନ୍ତି।
