କ୍ରିସ୍ମାସ୍ ବା ବଡଦିନ ପାଇଁ ଦେଶ ବିଦେଶ ଚାରିଆଡେ ଏବେ ଉତ୍ସବର ମାହୋଲ। କ୍ରିସ୍ମାସ୍ ଟ୍ରି, ରଙ୍ଗିନ ଲାଇଟର ଡେକୋରେଶନ ସାଙ୍ଗକୁ ସ୍ବତନ୍ତ୍ର ଉତ୍ସବର ଆୟୋଜନ ଲାଗି ପ୍ରାୟ ସମସ୍ତେ ବ୍ୟସ୍ତ। ଠିକ ସେହିଭଳି ମାଲେସିଆର କୁଆଲାଲମ୍ପୁରଠାରେ ଏହି ଅବସରରେ ପର୍ଯ୍ୟଟକଙ୍କ ମନୋରଞ୍ଜନ ଲାଗି ଏକ ସ୍ବତନ୍ତ୍ର ରେଷ୍ଟୁରାଣ୍ଟ ଡିନର ବ୍ୟବସ୍ଥା କରିଥାନ୍ତି। ‘ସାଣ୍ଟା ଇନ୍ ଦ ସ୍କାଏ’ ନାମକ ଏହି ରେଷ୍ଟୁରାଣ୍ଟର ସ୍ବତନ୍ତ୍ରତା ହେଉଛି ଏହା ଭୁପୃଷ୍ଠଠାରୁ ୧୫୦ ଫୁଟ ଉପରେ ଝୁଲନ୍ତା ଅବସ୍ଥାରେ ରହିଥାଏ। କ୍ରିସ୍ମାସ୍ ଅବସରରେ ଏହି ରେଷ୍ଟୁରାଣ୍ଟକୁ ଏକ ସ୍ଲେଜ୍ର ଆକାର ଦିଆଯାଏ, ଯାହାକୁ ୪ ଟି ରେନ୍ ଡିୟର ଟାଣିବାର ଭ୍ରମ ମଧ୍ୟ ସୃଷ୍ଟି କରାଯାଇଥାଏ। ୧୬ ସିଟ୍ ବିଶିଷ୍ଟ ଏହି ହ୍ୟାଙ୍ଗିଙ୍ଗ ରେଷ୍ଟୁରାଣ୍ଟରେ ପର୍ଯ୍ୟଟକମାନେ ସାଣ୍ଟାକ୍ଲଜ୍ ସହ ସ୍ପେଶିଆଲ କ୍ରିସ୍ମାସ୍ ଡିନର୍ର ମଜା ନେଇପାରିବେ। କେବଳ ସେତିକି ନୁହେଁ ଏହି ରାତ୍ରଭୋଜନ ସମୟରେ ଗ୍ରାହକଙ୍କ ମନୋରଞ୍ଜନ ଲାଗି ମ୍ୟୁଜିସିଆନମାନେ ଲାଇଭ କ୍ରିସ୍ମାସ୍ କ୍ୟାରୋଲ ବା ଗୀତ ପରିବେଷଣ କରିଥାନ୍ତି।
