ଲାଞ୍ଜିଗଡ଼, ୧୧।୧୨(ଡି.ଏନ.ଏ.)-କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ତ୍ରିଲୋଚନପୁର ପଁଚେତ୍ ଆମ୍ବଗୁଡ଼ା ଗଁାର ବିଧବା ମହିଲା ଲଛମି ମାଝି। ସରକାରୀ ସୁବିଧା ସୁଯୋଗ ଅଭାବୁ ସେ ନିଜର ୩ ଛୁଆକୁ ଧରି ବଡ଼ା ଗୁଲ୍ଗୁଲା ହେଇ ଜୀବନ୍ ବିତଉଛନ୍। ଅନେକ ସମିଆରେ ସେ ଥାନୀଅ ପରଶାସନକେ ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍।
ସୂଚନା ଅନ୍ସାରେ ଆମ୍ବଗୁଡ଼ା ଗଁାର ନିସାହା ବିଧବା ମହିଲା ଲଛମି ମାଝି(୩୧)କଁର ପରିବାର କହେଲେ ଦୁଇ ଝି’ ରିନା (୬), ପଦ୍ମା (୪) ଆର ପୁଓ ପ୍ରକାଶ(୩)କୁଁ ନେଇ ସଁସାର। ଆପ୍ନେ ସାଏବ ମାଝି ୨ ବଛର ତଲେ ଆରପାରକେ ଚାଲିଯାଇଛନ୍। ପରିବାରଟା ନିହାତି ଗରିବ୍, ସଁପତି ବଲି କିଛି ନାଇଁ। ଆପ୍ନେ କୁଲିମଜୁରି କରି କୁଟୁମ ପୁଷୁଥିଲେ। ସେ ଚାଲିଗଲା ଉତାରୁ ପରିବାରଟା ପୂରାପୂରି ବେସାହାରା ହେଇଯାଇଛନ୍। ଏନ୍ତାଥି ଲଛମି ପରହର ଘରେ କାମ୍ବୁତା କରି ଛୁଆକର ଲାଗି ଆହାର ଜୁଟଉଛନ୍। ସେଥ୍ରେ ବି ଅନେକ ଦିନ୍ ବେଲେ ଖାଏଲେ ବେଲେ ଉପାସ ରହିବାକେ ପଡ଼ୁଛେ। ଲଛ୍ମି ହରମେଶା ଛୁଆକର ଭବିଷତ ଚିନ୍ତାରେ ଘାରି ହେଉଛନ୍। ହେଲେ ଦୁଇବେଲା ଦୁଇମୁଠା ଖାଏବାରଟା ଜୁଟାବାରେ ଲଛମି ଯୁଝୁଛନ୍। ଏନ୍ତାଥି ସେ ଛୁଆପୁତାକୁ ଦୁଇଅଖର ପଢ଼େଇ ମୁନୁଷ୍ କରବାର କଥା ଭାବି ନାଇଁପାରବାର। ଇଆଡ଼େ ଆପ୍ନେ ଚାଲିଯିବାର ୨ ବଛର ବିତିଯାଇଥିଲେ ବି ଲଛମି ବିଧବା ଭତା ପାଏବାରୁ ବଁଚିତ୍ ହେଇ ରହିଛନ୍। ସେନ୍ତା ପରିବାରଟା ନିହାତି ଗରିବ୍ ହେଇଥିଲାବେଲେ ବିପଦ୍ ଅବସ୍ତାରେ ଥିବାର ଗୁଟେ ଦଦ୍ରା କୁରିଆରେ ଲଛମି ୩ ଛୁଆକୁ ଧରି ମୁଡ଼ ଗୁଁଜିଛନ୍। ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ଲଛମି ବାରବାର ପଁଚେତ୍ କତୁରପକ୍ଷକୁଁ ଗୁହାରି କରି ନିରାଶ ହେଇଥିବାର ଅଭିଯୋଗ କରିଛନ୍। ଇ ନିହାତି ଗରିବ୍ ଦୁଖି ବିଧବା ମହିଳାକଁର ଉପରେ ଜିଲା ଆର ବ୍ଲକ ପରଶାସନ ଦୁରୁଷ୍ଟି ଦେଇ ଯେତେ ଜଲ୍ଦି ହେବା ସବୁପରକାର ସରକାରୀ ସାହାଯ୍ ଯୁଗେଇ ଦେବାକେ ଆମ୍ବଗୁଡ଼ା ଗଁାବାସୀ ଦାବି କରିଛନ୍।
