ଉମରକୋଟ,୮।୬(ଡି.ଏନ.ଏ)-ନବରଙ୍ଗପୁର ଜିଲା ଉମରକୋଟ ବ୍ଲକ କୁର୍ସି ପଞ୍ଚାୟତର ମାଲପରା ଗ୍ରାମରେ ଶୁକ୍ରବାର ରାତିରେ ଏକ ହୃଦୟ ବିଦାରକ ଘଟଣା ଘଟିଯାଇଛି। ସାପ କାମୁଡାରେ ମା’ ଓ ପୁଅର ମୃତ୍ୟୁ ଘଟିଛି। ମୃତକମାନେ ହେଲେ ଲକ୍ଷ୍ମୀ ଗଣ୍ଡ ଓ ତାଙ୍କ ପୁଅ ଭାଗିରଥୀ ଗଣ୍ଡ(୫)। ମାଲପରା ଗ୍ରାମର ଭୂଜ ଗଣ୍ଡଙ୍କ ସ୍ତ୍ରୀ ଲକ୍ଷ୍ମୀ, ପୁଅ ଭାଗିରଥୀ ଓ ୨ ବର୍ଷର ଝିଅ ଶୁକ୍ରବାର ରାତିରେ ଘରେ ଶୋଇଥିଲେ। ରାତିରେ ଲକ୍ଷ୍ମୀଙ୍କ ଜଂଘ ଏବଂ ଭାଗିରଥୀଙ୍କ ହାତକୁ ଏକ ସାପ କାମୁଡି ଦେଇଥିଲା। ଲକ୍ଷ୍ମୀ ସଙ୍ଗେ ସଙ୍ଗେ ଭୂଜଙ୍କୁ ଉଠାଇଥିଲେ। ଘର ଭିତରେ ସାପ ଥିବାରୁ ସାପ କାମୁଡିଥିବା ସନ୍ଦେହ କରିଥିଲେ। ଭୂଜ ପଡୋଶୀଙ୍କ ସହାୟତାରେ ଲକ୍ଷ୍ମୀ ଓ ଭାଗିରଥୀଙ୍କୁ ଉମରକୋଟ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ । ସେଠାରେ ଡାକ୍ତର ୨ ଜଣଙ୍କୁ ମୃତ ଘୋଷଣା କରିଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପରେ ପରିବାର ବର୍ଗଙ୍କୁ ହସ୍ତାନ୍ତର କରିଛି । ମାଲପରା ଗ୍ରାମରେ ମୃତଦେହ ପହଞ୍ଚିବା ପରେ ଶୋକର ଛାୟା ଖେଳି ଯାଇଛି।
