ଭାରତୀୟ ସିନେ ଜଗତରେ ନିଜର ବଳିଷ୍ଠ ଅଭିନୟ ଦ୍ୱାରା ସ୍ବତନ୍ତ୍ର ପରିଚୟ ସୃଷ୍ଟି କରିପାରିଥିବା ଜଣେ ଅଭିନେତ୍ରୀ ହେଉଛନ୍ତି ଦୀନା ପାଠକ। ଆଜି ଅର୍ଥାତ୍ ଅକ୍ଟୋବର ୧୧ ହେଉଛି ତାଙ୍କର ୧୭ତମ ଶ୍ରାଦ୍ଧବାର୍ଷିକୀ। ୨୦୦୨ ମସିହାରେ ହୃଦ୍ଘାତରେ ଦିନାଙ୍କର ପରଲୋକ ଘଟିଥିଲା। ଉକ୍ତ ସମୟରେ ସେ ମାତ୍ର ୮୦ ବର୍ଷର ହୋଇଥିଲେ। ଶେଷ ସମୟ ପର୍ଯ୍ୟନ୍ତ ଦିନା ଅଭିନୟରେ ବେସ୍ ସକ୍ରିୟ ଥିଲେ। ଏତେବଡ଼ ଅଭିନେତ୍ରୀ ସତ୍ତ୍ୱେ ସେ ଭଡ଼ା ଘରେ ରହୁଥିଲେ। ତେବେ ନିଜର ଶେଷ ସମୟ ପୂର୍ବରୁ ସେ ଏକ ଘର କିଣିଥିଲେ।
୪ ମାର୍ଚ୍ଚ, ୧୯୨୨ରେ ଗୁଜୁରାଟର ଅମରେଲୀରେ ଦିନା ଜନ୍ମଗ୍ରହଣ କରିଥିଲେ। ଦିନାଙ୍କର ୨ଟି ଝିଅ। ବଡ଼ ଝିଅ ରତ୍ନା ଏବଂ ସାନ ଝିଅ ସୁପ୍ରିୟା ଅଭିନୟ ଜଗତରେ ବେଶ୍ ପରିଚିତ। ରତ୍ନା ନାଶିରୁଦ୍ଦିନ ଶାହଙ୍କୁ ବିବାହ କରିଥିବା ବେଳେ ସୁପ୍ରିୟାଙ୍କ ସ୍ବାମୀ ହେଉଛନ୍ତି ପଙ୍କଜ କପୁର। ଏହି ଦୁଇ ଜଣ ବଲିଉଡ୍ ଜଗତର ୨ଟି ବଡ଼ ନାମ କହିଲେ କିଛି ଭୁଲ ହେବ ନାହିଁ।
ଦିନା ବଲଦେବ ପାଠକଙ୍କୁ ବିବାହ କରିଥିଲେ। ଯିଏକି ମୁମ୍ବାଇର ଏକ ଦୋକାନରେ କପଡ଼ା ସିଲେଇ କାମ କରୁଥିଲେ। ବଲଦେବ ରାଜେଶ ଖନ୍ନା ଏବଂ ଦିଲ୍ଲୀପ କୁମାରଙ୍କ ପରି ଅଭିନେତାଙ୍କ ପୋଷାକ ତିଆରି କରୁଥିଲେ। ରାଜେଶଙ୍କ ଅଭିନୟ କ୍ୟାରିୟର ଯେତେବେଳେ ଖରାପ ଚାଲିଲା ସେତେବେଳେ ବଲଦେବଙ୍କ ଦୋକାନ ଉପରେ ମଧ୍ୟ ଏହାର ପ୍ରଭାବ ପଡ଼ିଥିଲା। ପରେ ତାଙ୍କୁ ନିଜ ଦୋକାନ ବନ୍ଦ କରିବାକୁ ପଡ଼ିଥିଲା। ଏହାର କିଛି ବର୍ଷ ପରେ ଅର୍ଥାତ୍ ୫୨ ବର୍ଷରେ ବଲଦେବଙ୍କ ପରଲୋକ ଘଟିଥିଲା। ଦୀନା ୧୨୦ରୁ ଊର୍ଦ୍ଧ୍ୱ ସିନେମାରେ କାମ କରିଛନ୍ତି ଏବଂ ତାଙ୍କର ଅଭିନୟ କ୍ୟାରିୟର ୬୦ ବର୍ଷ ଲମ୍ବା ଥିଲା। ଫିଲ୍ମ ସାଙ୍ଗକୁ ଗୁଜୁରାଟି ଥିଏଟରରେ ମଧ୍ୟ ଖୁବ୍ ସକ୍ରିୟ ଥିଲେ।
