ସୋନପୁର,୨୪।୮(ନି.ପ୍ର.) : ଗଡଜାତ ପରମ୍ପରା ଅନୁସାରେ ନୂଆଁଖାଇ ଲଗ୍ନ ଶନିବାର ଅପରାହ୍ନ ୪ଟାରେ ସୋନପୁର ଗଡଭିତର ଜଗନ୍ନାଥ ମନ୍ଦିର ପରିସରରେ ଧାର୍ଯ୍ୟ ହୋଇଛି। ସେପ୍ଟେମ୍ବର ୩ତାରିଖ ଭାଦ୍ରବ ମାସ ଶୁକ୍ଳ ପକ୍ଷ ୧୮ ଦିନ ପଞ୍ଚମୀ ତିଥି ମଙ୍ଗଳବାର ସମଲେଇ ମନ୍ଦିରରୁ ସ୍ବତନ୍ତ୍ର ଭାବେ ପାହୁର ଶୋଭାଯାତ୍ରା ସକାଳ ୮ଟା ୪୬ ମିନିଟ୍ରୁ ୯ଟା ୨୮ ମିନିଟ୍ ମଧ୍ୟରେ ବାହାରିବ। ଏହା ଅଷ୍ଟଚଣ୍ଡୀଙ୍କ ପୀଠକୁ ଯିବ। ସକାଳ ଘ୯.୫୭ମିନିଟ୍ରୁ ଘ୧୦.୧୧ମିନିଟ୍ ମଧ୍ୟେ ବିଶୁଦ୍ଧ ତୁଳା ନକ୍ଷତ୍ର ଲଗ୍ନ ଅମୃତ ସମୟରେ ଜିଲାର ଅଧିଷ୍ଠାତ୍ରୀ ଦେବୀ ମା’ ସୁରେଶ୍ୱରୀଙ୍କଠାରେ ନବାହ୍ନ ଭୋଗ ଲାଗିବ। ଏହାପରେ ଜିଲାବାସୀ ନବାହ୍ନ ଭକ୍ଷଣ କରିବେ। ଜିଲାର ପଣ୍ଡିତମାନେ ସମବେତ ହୋଇ ଏହି ଲଗ୍ନ ଧାର୍ଯ୍ୟ କରିଛନ୍ତି। ସମସ୍ତଙ୍କ ସମ୍ମତି ହେବା ପରେ ପଣ୍ଡିତ ସମବେତ ମନ୍ତ୍ରୋଚାରଣରେ ମନ୍ଦିର ଗୁଞ୍ଜରିତ ହେବା ସହ ବିଶେଷ ପୂଜାର୍ଚ୍ଚନା ହୋଇଥିଲା। ପଣ୍ଡିତ ମହାସଭାରେ ଜ୍ୟୋର୍ତିବିତ୍ ସୀତାଂଶୁ ଶେଖର ପାଣିଗ୍ରାହୀ, ରାଜେନ୍ଦ୍ର କୁମାର ମହାପାତ୍ର, ମହେଶ କୁମାର ପୂଜାହାରୀ, ରାମଗୋପାଳ ପୂଜାହାରୀ, ବୈଦ୍ୟନାଥ ଗୁରୁ, ସଚ୍ଚିଦାନନ୍ଦ ଦାଶ ଓ ଗୌରିଶଙ୍କର ରଥଙ୍କ ସମେତ ବହୁ ପଣ୍ଡିତ ଲଗ୍ନଧାର୍ଯ୍ୟରେ ସାମିଲ ଥିଲେ। ଏଥିସହ ମ୍ୟୁନିସିପାଲିଟିର ଜନସୂଚନା ଅଧିକାରୀ ଶିବରାମ ସାହୁ, ସତ୍ୟନାରାୟଣ ସାହୁ, ସାମାଜିକ କର୍ମୀ ଶ୍ରୀବତ୍ସ ମଲ୍ଲିକ, ବାଳମୁକୁନ୍ଦ ସାହୁ, ଷଷ୍ଠୀ ବଡମାଳୀ ଓ ପ୍ରଫୁଲ୍ଲ ଥନାପତି ପ୍ରମୁଖ ବହୁ ବିଶିଷ୍ଟ ବ୍ୟକ୍ତି ଉପସ୍ଥିତ ଥିଲେ।
