ପୁରୀ ଅଫିସ, ୨୯ା୫: ଆସନ୍ତା ଜୁଲାଇ ୪ରେ ରଥଯାତ୍ରା। ଏଥିପାଇଁ ରଥଖଳାରେ ତିନିରଥ ନିର୍ମାଣ ଚାଲିଛି। ସବୁ ରଥର ତୁମ୍ବ ନିର୍ମାଣ ଶେଷ ହୋଇ ଚକ ତିଆରି କରାଯାଉଛି । ତେବେ ମଙ୍ଗଳବାର ସୁଭଦ୍ରା ରଥର ଏକ ଚକ ନିର୍ମାଣ ସମୟରେ ତୁମ୍ବରେ ଫାଟ ହୋଇଥିବା ଦେଖିବାକୁ ମିଳିଛି। ପରେ ଏହି ତୁମ୍ବ ବଦଳାଯାଇ ନୂତନ ତୁମ୍ବ ତିଆରି ଆରମ୍ଭ ହୋଇଛି।
ଅକ୍ଷୟ ତୃତୀୟାଠାରୁ ରଥଖଳାରେ ରଥ ନିର୍ମାଣ ଆରମ୍ଭ ହୋଇଛି। ପ୍ରଥମେ ତିନି ରଥର ତୁମ୍ବ ତିଆରି କରାଯାଇଥିଲା। ତିନି ରଥର ୪୨ଟି ତୁମ୍ବ ନିର୍ମାଣ ପରେ ସେଥିରେ ବିନ୍ଧ କରାଯାଇଥିଲା। ପରେ ଏଥିରେ ପଇ ସଂଯୋଗ କରାଯାଇ ଚକ ତିଆରି ଚାଲିଛି। ଭଉଁରିରେ ତିନି ରଥର ୨ଟି ଲେଖାଏ ଚକ ଅଖ ସହ ସଂଯୋଗ କରାଯାଇଥିବା ବେଳେ ବର୍ତ୍ତମାନ ଅନ୍ୟ ଚକ ତିଆରି ଚାଲିଛି । ତେବେ ମଙ୍ଗଳବାର ଅପରାହ୍ନରେ ବିଲେଇ ବାଡ଼ିିଆ (ଅରରେ ପଇ ସଂଯୋଗ) ଚାଲିଥିଲା। ଏହି ସମୟରେ କେତେଜଣ ଭୋଇ ସେବକ ଏବଂ ମହାରଣା ସେବକ ସୁଭଦ୍ରାଙ୍କ ରଥର ଏକ ତୁମ୍ବରେ ଫାଟ ହୋଇଥିବା ଦେଖିଥିଲେ। ଏ ନେଇ ସେମାନେ ମୁଖ୍ୟ ବିଶ୍ୱକର୍ମା କୃଷ୍ଣଚନ୍ଦ୍ର ମହାରଣାଙ୍କ ଦୃଷ୍ଟି ଆକର୍ଷଣ କରିଥିଲେ। ପରେ ଏହାକୁ ବଦଳାଯାଇ ଏକ ନୂଆ ତୁମ୍ବ ତିଆରି କରାଯାଉଥିବା ଜଣାପଡ଼ିଛି।
ସାଧାରଣତଃ ତୁମ୍ବରେ ଅର ସଂଯୋଗ ପରେ ଉଭୟ ପାର୍ଶ୍ୱରେ ଲୁହାର ବଳା ପିନ୍ଧା ଯାଇଥାଏ। ବଳା ପିନ୍ଧାଇବା ଅଥବା ସିଙ୍ଗଡ଼ା ବାଡ଼ିଆ ସମୟରେ ଏଥିରେ ଫାଟ ହୋଇଥାଇପାରେ ବୋଲି ମହାରଣା ସେବକମାନେ ସନ୍ଦେହ କରୁଛନ୍ତି। ଅନ୍ୟପକ୍ଷରେ ମଙ୍ଗଳବାର ସୁଦ୍ଧା ନନ୍ଦିଘୋଷ ଏବଂ ତାଳଧ୍ୱଜ ରଥର ୪ଟି ଲେଖାଏ ଏବଂ ଦେବୀ ରଥର ୩ଟି ଚକ ନିର୍ମାଣ ସରିଛି। ରଥଖଳାରେ ୭ଟି ଅରମୁଣ୍ଡି ଏବଂ ୮ଟି ଅଖ କାଠ ପଡ଼ିିଥିବା ଭୋଇ ସର୍ଦ୍ଦାର ରବି ଭୋଇ କହିଛନ୍ତି। ନୃସିଂହ ଚତୁର୍ଦ୍ଦଶୀଠାରୁ ରୂପକାର ସେବକମାନେ ଖୋଦେଇ କାର୍ଯ୍ୟରେ ଯୋଗଦେଇଛନ୍ତି। କଣଗୁଜ ଖୋଦେଇ ଶେଷ ପର୍ଯ୍ୟାୟରେ ପହଞ୍ଚତ୍ ଥିବା ରୂପକାର ସେବକ ପଞ୍ଚାନନ ମହାପାତ୍ର ସୂଚନା ଦେଇଛନ୍ତି। ସେହିପରି ଦୋଳବେଦୀ କୋଣସ୍ଥିତ ଅସ୍ଥାୟୀ କମାରଶାଳରେ କଣ୍ଟା ତିଆରି କାମ ଜୋର୍ସୋରରେ ଚାଲିଛି। ରଥ ନିର୍ମାଣ କାମ ଦେଖିବା ପାଇଁ ପ୍ରତ୍ୟହ ଖଳା ନିକଟରେ ଲୋକଙ୍କ ଭିଡ଼ ଜମୁଛି।
