ଭବାନୀପାଟଣା,୧୫।୩(ଡି.ଏନ୍.ଏ.): କଳାହାଣ୍ଡି ଜିଲା ଗୋଲାମୁଣ୍ଡା ବ୍ଲକ ଖଲିଆକାନି ଗାଁରେ କରୋନା ଆକ୍ରାନ୍ତ ଜଣେ ଯୁବକ କବାଟ ବନ୍ଦକରି ଘରେ ରହିବା ସମ୍ପର୍କିତ ମିଛ ଖବରକୁ ସୋସିଆଲ ମିଡିଆରେ ଭାଇରାଲ କରିବା ଜଣେ ଶିକ୍ଷକଙ୍କୁ ମହଙ୍ଗା ପଡିଛି। ଶନିବାର ସନ୍ଧ୍ୟାରେ ସମ୍ପୃକ୍ତ ଶିକ୍ଷକ ବିନ୍ଦୁ ମହାନନ୍ଦଙ୍କୁ ପୋଲିସ ଗିରଫ କରିଛି।
ପୋଲିସ ସୂତ୍ରରୁ ପ୍ରକାଶ ଯେ, ଗୋଲାମୁଣ୍ଡା ବ୍ଲକ ବୁଡକେଲ ଗ୍ରାମର ଶିକ୍ଷକ ବିନ୍ଦୁ ସୋସିଆଲ ମିଡିଆରେ ଖଲିଆକାନି ଗାଁରେ ଜଣେ କରୋନା ଆକ୍ରାନ୍ତ ଅଛନ୍ତି ଏବଂ ବିଡିଓ ଓ ଥାନା ଅଧିକାରୀ ଘଟଣାସ୍ଥଳକୁ ଯାଇଥିବା ବେଳେ ସମ୍ପୃକ୍ତ ଯୁବକ ତାଟି କବାଟ ବନ୍ଦ କରି ରହିଛନ୍ତି ବୋଲି ଏକ ମିଛ ଖବର ଭାଇରାଲ କରିଥିଲେ। ଏହି ମିଛ ଖବର ପ୍ରଚାରିତ ହେବା ପରେ ଜିଲାରେ ଆଲୋଡନ ସୃଷ୍ଟି ହେବା ସହିତ ଲୋକେ ଆତଙ୍କିତ ହୋଇ ପଡିଥିଲେ। ସନ୍ଧ୍ୟାରେ ଗୋଲାମୁଣ୍ଡା ପୋଲିସ ଏସ୍ଆଇ ଉଗ୍ରସେନ ପଟେଲ ଏକ ମାମଲା ରୁଜୁ କରି ବିନ୍ଦୁଙ୍କୁ ଗିରଫ କରିଥିଲେ। ରବିବାର ବିନ୍ଦୁଙ୍କୁ କୋର୍ଟଚାଲାଣ କରାଯାଇଛି ବୋଲି ପୋଲିସ ଏସ୍ପି ବାତୁଲା ଗଙ୍ଗାଧର ସୂଚନା ଦେଇଛନ୍ତି। ବିନ୍ଦୁ ବୁଡକେଲ ଉଚ୍ଚପ୍ରାଥମିକ ବିଦ୍ୟାଳୟରେ ଅସ୍ଥାୟୀ ଶିକ୍ଷକ ଭାବେ ପିଲାଙ୍କୁ ପାଠ ପଢ଼ାନ୍ତି।
