ନୂଆଗାଁ, ୧୧।୩ (ଡି.ଏନ୍.ଏ.): ନୟାଗଡ଼ ଜିଲା ନୂଆଗାଁ ଥାନା ମହିପୁର କଇଁଆ ସାହିରେ ମଙ୍ଗଳବାର ସ୍ବାମୀଙ୍କ ଆକ୍ରମଣରେ ସ୍ତ୍ରୀ ଗୁରୁତର ହୋଇଛନ୍ତି। ଗୁରୁତର ହେଲେ ଲକ୍ଷ୍ମୀ ନାୟକ।
ମିଳିଥିବା ସୂଚନା ଅନୁଯାୟୀ, ମହିପୁର ଗ୍ରାମର ବସନ୍ତ ନାୟକ ମଦ୍ୟପାନକରି ସ୍ତ୍ରୀ ଲକ୍ଷ୍ମୀଙ୍କୁ ସବୁବେଳେ ଗାଳିଗୁଲଜ କରିବା ସହ ମାରପିଟ କରୁଥିଲେ। ତେଣୁ ଲକ୍ଷ୍ମୀ ଗତ କିଛିଦିନ ହେବ ନିଜ ବାପଘରେ ରହୁଥିଲେ। ମଙ୍ଗଳବାର ସନ୍ଧ୍ୟାରେ ଲକ୍ଷ୍ମୀଙ୍କୁ ଆଣିବା ପାଇଁ ବସନ୍ତ ଶ୍ୱଶୁରଘରକୁ ଯାଇଥିଲେ। ସେଠାରେ ଲକ୍ଷ୍ମୀଙ୍କୁ ବାହାରକୁ ଡାକି ଅଣ୍ଟାରେ ରଖିଥିବା ଛୁରି ସାହାଯ୍ୟରେ ଆକ୍ରମଣ କରିଥିଲେ। ଗୁରୁତର ଅବସ୍ଥାରେ ସ୍ଥାନୀୟ ଲୋକେ ଲକ୍ଷ୍ମୀଙ୍କୁ ନୟାଗଡ଼ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ଅବସ୍ଥା ଗୁରୁତର ହେବାରୁ ତାଙ୍କୁ ଭୁବନେଶ୍ୱର ସ୍ଥାନାନ୍ତର କରାଯାଇଛି। ଘଟଣା ପରେ ବସନ୍ତ ଫେରାର ହୋଇଯାଇଥିଲେ। ଅଭିଯୋଗ ପାଇ ମହିପୁର ଫାଣ୍ଡି ପୋଲିସ ବସନ୍ତଙ୍କୁ ଗିରଫ କରିଥିବା ଜଣାପଡିଛି ।
