ବଲାଙ୍ଗୀର ଅଫିସ,୨୮ା୫: ସ୍ବାସ୍ଥ୍ୟ ବିଭାଗରେ କାମ କରୁଥିବା ଅସ୍ଥାୟୀ କର୍ମଚାରୀମାନେ ସ୍ଥାୟୀ ମାନ୍ୟତା ଦାବିରେ ଗୁରୁବାର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସିଡିଏମ୍ଓଙ୍କୁ ୪ଦଫା ଦାବିପତ୍ର ପ୍ରଦାନ କରିଛନ୍ତି। ସେମାନେ ଏହି ଦାବିପତ୍ର ମାଧ୍ୟମରେ କହିଛନ୍ତି ଯେ, ଗତ ଜୁନ୍ ୨୦୧୩ରେ ପଦବୀ ଘୋଷଣା ହେବା ପରେ ସେପ୍ଟେମ୍ବର ୨୦୧୩ରେ ସେମାନଙ୍କୁ ନିଯୁକ୍ତି ପ୍ରଦାନ କରାଯାଇଥିଲା। ନିଯୁକ୍ତି ପାଇବା ପରଠାରୁ ବିଭିନ୍ନ ପରିସ୍ଥିତି ମଧ୍ୟରେ ଜନସାଧାରଣଙ୍କୁ ସେବା ଯୋଗାଇ ଆସୁଛନ୍ତି। କିନ୍ତୁ ୬ବର୍ଷରୁ ଅଧିକ ହେବ ଜନତାଙ୍କୁ ସ୍ବାସ୍ଥ୍ୟସେବା ଯୋଗାଇ ଦେବା ପରେ ମଧ୍ୟ ସରକାର ନିୟମିତ କର୍ମଚାରୀଙ୍କ ତୁଳନାରେ ବିଭିନ୍ନ ସୁବିଧା ସୁଯୋଗରୁ ବଞ୍ଚିତ ରଖିଛନ୍ତି। ସମାନ କାମକୁ ସମାନ ଦରମା, ୬ବର୍ଷ କାର୍ଯ୍ୟକାଳ ପରେ ନିୟମିତ ମାନ୍ୟତା, ଗ୍ରେଡେସନ ଇନ୍କ୍ରିମେଣ୍ଟ, କୋଭିଡ- ୧୯ ପାଇଁ ୫୦ ଲକ୍ଷର ଜୀବନ ବୀମା ଓ ଅଗ୍ରୀମ ୪ ମାସର ଦରମା ପ୍ରଦାନ କରିବାକୁ ଦାବି କରିଛନ୍ତି। ଆସନ୍ତା ୩୦ ଦିନ ମଧ୍ୟରେ ୪ ଦଫା ଦାବି ପୂରଣ କରା ନ ଗଲେ ରାଜ୍ୟ ସରକାରଙ୍କ ବିରୋଧରେ ଆନ୍ଦୋଳନ ଜାରି ରହିବ ବୋଲି ରମିତା ବେହେରା, ଦୀପାଳି ଧରୁଆ, ଅନିତା ମହାନନ୍ଦ, ଜ୍ୟୋତି ସାହୁ, ଚନ୍ଦ୍ରମା ସାହ, ଅନିତାରାଣୀ ନାଏକ ପ୍ରମୁଖ ଚେତାବନୀ ଦେଇଛନ୍ତି।
