ପୁରୀ ଅଫିସ,୨୧।୫: ଆସନ୍ତା ଜୁନ୍ ୫ତାରିଖରେ ସ୍ନାନଯାତ୍ରା। ସ୍ନାନମଣ୍ଡପରେ ପ୍ରତ୍ୟକ୍ଷ ସ୍ନାନ କରିବେ ଦାରୁଦିଅଁ। ତେଣୁ ସ୍ନାନଯାତ୍ରାକୁ କିପରି ଶୃଙ୍ଖଳିତ ଭାବେ ସମ୍ପନ୍ନ କରାଯିବ ସେ ନେଇ ବିଭିନ୍ନ ନିଯୋଗ ସହ ଆଲୋଚନା କରୁଛି ଶ୍ରୀମନ୍ଦିର ପ୍ରଶାସନ। ଗତ ୧୨ ତାରିଖରେ ଦଇତାପତି ନିଯୋଗ ସହ ଆଲୋଚନା ହୋଇଥିବାବେଳେ ଗୁରୁବାର ସ୍ନାନଯାତ୍ରା ସହ ସମ୍ପୃକ୍ତ ଅନ୍ୟ ୧୦ଟି ନିଯୋଗ ସହ ବୈଠକ ହେବ। ମଧ୍ୟାହ୍ନ ୧୨ଟାରେ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ମୁଖ୍ୟ ପ୍ରଶାସକଙ୍କ ଅଧ୍ୟକ୍ଷତାରେ ଏହି ବୈଠକ ହେବାର କାର୍ଯ୍ୟକ୍ରମ ରହିଛି। ବିଶେଷକରି ସରକାରଙ୍କ କୋଭିଡ-୧୯ ଗାଇଡଲାଇନକୁ ମାନି କିପରି ଠାକୁରଙ୍କ ନୀତିକାନ୍ତି କରାଯିବ ସେନେଇ ଆଲୋଚନା ହେବ। ସେହିପରି ସାମାଜିକ ଦୂରତା ଉପରେ ଯେପରି ସମସ୍ତେ ଗୁରୁତ୍ୱ ଦେବେ ସେ ସମ୍ପର୍କରେ ସେବାୟତମାନଙ୍କୁ କୁହାଯିବ ବୋଲି ସୂଚନା ମିଳିଛି।
