ମାଡ୍ରିଡ୍, ୧୭।୩ (ଏଏଫ୍ପି)- ସ୍ପେନ ଫୁଟ୍ବଲ କ୍ଲବ ଭାଲେନସିଆ ଦଳର ୩୫ ପ୍ରତିଶତ ଖେଳାଳି ମାରାତ୍ମକ କରୋନା ଭାଇରସ୍ରେ ଆକ୍ରାନ୍ତ ରହିଛନ୍ତି। କ୍ଲବର ଏକତୃତୀୟାଂଶ ଖେଳାଳି ଓ ଷ୍ଟାଫ୍ଙ୍କ ରିପୋର୍ଟ ପଜିଟିଭ ବାହାରିଥିବା କ୍ଲବ ପକ୍ଷରୁ ଘୋଷଣା କରାଯାଇଛି। ଭାଲେନସିଆ ଗତ ମାସରେ ଆଟ୍ଲାଣ୍ଟ ବିପକ୍ଷ ଚାମ୍ପିୟନ୍ସ ଲିଗ୍ ରାଉଣ୍ଡ-୧୬ ମ୍ୟାଚ୍ ଖେଳିବା ଲାଗି ଇଟାଲୀର ମିଲାନ ସହର ଗସ୍ତ କରିଥିଲା। ସେହି ସମୟରେ ଖେଳାଳିଙ୍କ ମଧ୍ୟରେ ଭାଇରସ୍ ବ୍ୟାପୀଥିବା କ୍ଲବ ପକ୍ଷରୁ କୁହାଯାଇଛି। ‘ମ୍ୟାଚ୍ ପରେ କ୍ଲବ ପକ୍ଷରୁ ସତର୍କତାମୂଳକ ପଦକ୍ଷେପ ନିଆଯିବା ସତ୍ତ୍ୱେ ବର୍ତ୍ତମାନର ରିପୋର୍ଟରେ ୩୫ ପ୍ରତିଶତ ପଜିଟିଭ ବାହାରିଛି। ସମସ୍ତଙ୍କୁ ବର୍ତ୍ତମାନ ଘରେ ଆଇସୋଲେଟ୍ରେ ରଖାଯାଇ ମେଡିକାଲ ଚିକିତ୍ସା ଯୋଗାଇ ଦିଆଯାଉଛି’ ବୋଲି ଭାଲେନସିଆ କ୍ଲବ ପକ୍ଷରୁ ଏକ ବିବୃତିରେ କୁହାଯାଇଛି। କରୋନା ଦ୍ୱାରା ୟୁରୋପ୍ରେ ଅଧିକ ମାତ୍ରାରେ ପ୍ରଭାବିତ ହୋଇଥିବା ଦେଶମାନଙ୍କ ମଧ୍ୟରେ ସ୍ପେନ ୨ୟ ସ୍ଥାନରେ ରହିଛି। ବର୍ତ୍ତମାନ ସୁଦ୍ଧା ସ୍ପେନରେ ୯୧୦୦ ଜଣ ଆକ୍ରାନ୍ତ ହୋଇଥିବାବେଳେ ୩୦୯ ଜଣ ମୃତ୍ୟୁବରଣ କରିସାରିଛନ୍ତି।
