କରାଚୀ,୨୧।୧୨- ପାକିସ୍ତାନ ଓପନର ଆବିଦ ଅଲି ଶ୍ରୀଲଙ୍କା ବିପକ୍ଷ ଦ୍ୱିତୀୟ ଟେଷ୍ଟରେ ଶତକ ହାସଲ କରିଛନ୍ତି। ଏହା ସହିତ ଆବିଦ କ୍ରମାଗତ ପ୍ରଥମ ଦୁଇ ଟେଷ୍ଟରେ ଶତକ ହାସଲ କରିଥିବା ଟେଷ୍ଟ ବ୍ୟାଟ୍ସମ୍ୟାନଙ୍କ ତାଲିକାରେ ସ୍ଥାନ ପାଇଛନ୍ତି। ଶ୍ରୀଲଙ୍କା ସ୍ପିନର ଲାସିଥ ଏମ୍ବୁଲଡେନିୟାଙ୍କ ବଲକୁ ସୁଇପ୍ ଶଟ୍ ଖେଳି ୩୨ ବର୍ଷୀୟ ବ୍ୟାଟ୍ସମ୍ୟାନ କ୍ୟାରିୟରର ଦ୍ୱିତୀୟ ଶତକ ପୂରଣ କରିଛନ୍ତି। ଏଥିପୂର୍ବରୁ ରାଓ୍ବଲପିଣ୍ଡଠାରେ ପଦାର୍ପଣ ଟେଷ୍ଟରେ ଆବିଦ ୧୦୯ ରନ୍ର ଇନିଂସ ଖେଳିଥିଲେ। ବିଶ୍ୱର ୯ମ ବ୍ୟାଟ୍ସମ୍ୟାନ ଭାବେ କ୍ୟାରିୟରର ପ୍ରଥମ ଦୁଇ ଟେଷ୍ଟରେ ଶତକ ହାସଲ କରିଛନ୍ତି। ଏହି ତାଲିକାରେ ସାମିଲ ହେବାରେ ସେ ପ୍ରଥମ ପାକିସ୍ତାନ କ୍ରିକେଟର। ଭାରତର ପୂର୍ବତନ ଅଧିନାୟକ ମହମ୍ମଦ ଆଝାରୁଦ୍ଦିନ ୧୯୮୪ରେ କ୍ୟାରିୟରର ପ୍ରଥମ ୩ ଟେଷ୍ଟରେ ୩ ଶତକ କରିଥିଲେ। ତାଙ୍କ ବ୍ୟତୀତ ସୌରଭ ଗାଙ୍ଗୁଲି, ରୋହିତ ଶର୍ମା, ଅଷ୍ଟ୍ରେଲିଆର ଓ୍ବିଲିୟମ ପନସଫର୍ଡ, ଡଗ ଓ୍ବାଲଟର, ଗ୍ରେଗ ବ୍ଲଓ୍ବେଟ୍ଟ, ଓ୍ବେଷ୍ଟଇଣ୍ଡିଜର ଆଲଭିନ କାଲିଚରଣ ଓ ନ୍ୟୁଜିଲାଣ୍ଡର ଜିମି ନିଶାମ ତାଲିକାରେ ରହିଛନ୍ତି।
