ଷ୍ଟକ୍ହୋମ,୨୨।୪: ସ୍ବିଡେନ୍ରେ କରୋନା ସଂକ୍ରମିତଙ୍କ ସଂଖ୍ୟା ୧୪,୭୭୭ରେ ପହଞ୍ଚି ଥିବାବେଳେ ୧,୫୮୦ ଜଣଙ୍କ ଜୀବନ ଯାଇଛି। ତେବେ ଏହାର
ମୁକାବିଲା ପାଇଁ ସ୍ବିଡେନରେ ଲକ୍ଡାଉନ କଟକଣା ସେଭଳି ଫଳପ୍ରଦ ନୁହେଁ ବୋଲି କୁହାଯାଇଛି। ଭୂତାଣୁଠାରୁ ଲୋକଙ୍କୁ ଦୂରେଇ ରଖିବା ଲାଗି ଲକ୍ଡାଉନର କୌଣସି ଆବଶ୍ୟକତା ନ ଥିବା ଏଦେଶ କହିଛି। ଏବେ ଏଠାରେ ସ୍କୁଲ, ଜିମ୍, ବାର୍, କାଫେ, ରେଷ୍ଟୁରାଣ୍ଟ ଆଦି ଖୋଲା ରହିଛି। ଲୋକମାନେ ଦାୟିତ୍ୱବାନ ହୋଇ କେବଳ ସାମାଜିକ ଦୂରତ୍ୱ ଅବଲମ୍ବନ କରିବା ଲାଗି ପରାମର୍ଶ ଦିଆଯାଇଛି। ଲକ୍ଡାଉନ ଯୋଗୁ ଆର୍ଥତ୍କ ସ୍ଥିତି ଭୁଶୁଡ଼ି ପଡ଼ିବାର ଆଶଙ୍କା ରହିଥିବାରୁ ଏଭଳି ରଣନୀତି ପ୍ରସ୍ତୁତ କରାଯାଇଛି।
ସ୍ବିଡେନର ସ୍ବାସ୍ଥ୍ୟ, ପରିମଳ ବ୍ୟବସ୍ଥାଠାରୁ ଆରମ୍ଭ କରି ହସ୍ପିଟାଲ, ଡାକ୍ତରୀ ଚିକିତ୍ସା, ଯନ୍ତ୍ରପାତି ସବୁ ବିଶ୍ୱସ୍ତରୀୟ। ଜରୁରିକାଳୀନ ସ୍ବାସ୍ଥ୍ୟସେବା ଲାଗି ଏଠାକାର ସରକାର ପୂର୍ଣ୍ଣ ପ୍ରସ୍ତୁତ। ହେଲେ ଲକ୍ଡାଉନ ଏଠାରେ ପାଳନ କରିବା ସମ୍ଭବପର ନୁହେଁ ବୋଲି ଦର୍ଶାଯାଇଛି। ମହାମାରୀ ବିଶେଷଜ୍ଞମାନେ କରୋନା ଭୂତାଣୁର ଭୟାବହତା ସମ୍ପର୍କରେ ଅବଗତ କରାଇଥିଲେ ବି ସରକାର କଠୋର ପଦକ୍ଷେପ ଗ୍ରହଣ କରିନାହାନ୍ତି। ପ୍ରଧାନମନ୍ତ୍ରୀ ଷ୍ଟିଫେନ ଲୋଫ୍ଭେନ ପରିସ୍ଥିତିର ସମୀକ୍ଷା କରୁଛନ୍ତି। ଭୂତାଣୁ ସଂକ୍ରମଣକୁ ରୋକିବା ଲାଗି ବିଭିନ୍ନ ପଦକ୍ଷେପ ଗ୍ରହଣ କରାଯାଉଥିବା ସେ କହିଛନ୍ତି।
