ବର୍ତ୍ତମାନ ଜିମ୍ରେ ଏକ୍ସରସାଇଜ୍ କରିବା ଅଧିକାଂଶ ଯୁବତୀ ଯୁବକଙ୍କ ଫିଟ୍ନେସ୍ ମନ୍ତ୍ର ପାଲଟିଛି। ହେଲେ ଘର ପାଖରେ ଜିମ୍ ନ ଥିବାରୁ ହେଉ ଅବା ଅଧିକ ଟଙ୍କା ଖର୍ଚ୍ଚ ଭଳି ବିଭିନ୍ନ କାରଣରୁ ଅନେକେ ଏଥିରୁ ବଞ୍ଚତ୍ତ ହେଉଛନ୍ତି। ଯଦି ଆପଣ ବି ଏଥିପାଇଁ ଦୁଃଖିତ, ତେବେ କିଛି ସ୍ମାର୍ଟ ଜିମ୍ ଗ୍ୟାଜେଟ୍ ରଖି ନିଜେ ମଧ୍ୟ ଘରେ ଏକ୍ସରସାଇଜ୍ କରି ନିଜକୁ ଫିଟ୍ ରଖିପାରିବେ…
ଫିଟ୍ନେସ୍ ଟ୍ରାକର ବ୍ୟାଣ୍ଡ୍ କିମ୍ବା ସ୍ମାର୍ଟ ଓ୍ବାଚ୍: ଏହା ବର୍ତ୍ତମାନ ଏକ୍ସରସାଇଜ୍ କରୁଥିବା ପ୍ରାୟ ଅଧିକାଂଶଙ୍କ ଲାଗି ଏକ ଅତ୍ୟାବଶ୍ୟକ ଗ୍ୟାଜେଟ୍ ପାଲଟି ଗଲାଣି। ଏହାଦ୍ୱାରା ଦିନକୁ କେତେ ଚାଲିଲେ, କେତେ କ୍ୟାଲୋରି ବର୍ନ କଲେ, ହାର୍ଟବିଟ୍ ଇତ୍ୟାଦି ସୂଚନା ପାଇପାରିବେ। ଏଥିରେ ୩୦୦ରୁ ଅଧିକ ଗୀତ ଷ୍ଟୋର କରି ରଖିପାରିବେ। ଏହାକୁ ଜିପିଏସ୍ ସହ କନେକ୍ଟ କରି ନିଜର ଲୋକେଶନ୍ ସମ୍ପର୍କିତ ବିଭିନ୍ନ ତଥ୍ୟ ଜାଣିପାରିବେ।
ଯୋଗ ମ୍ୟାଟ୍: ବର୍ତ୍ତମାନ ମାର୍କେଟ୍ରେ ସଫ୍ଟ ମ୍ୟାଟେରିଆଲ୍ରେ ପ୍ରସ୍ତୁତ ଯୋଗ ମ୍ୟାଟ୍ ମିଳୁଛି। ଯାହା ଉପରେ ବସି କିମ୍ବା ଶୋଇ ଯୋଗ କଲେ କହୁଣି, ଆଣ୍ଠୁ ଆଦିରେ ଆଦୌ ଚାପ ପଡୁନାହିଁ। ଏହା ଲଙ୍ଗ୍ ଲାଷ୍ଟିଙ୍ଗ୍ ଏବଂ ରୋଲ୍ କରି କ୍ୟାରି କରିବା ବି ଖୁବ୍ ସହଜ ହେଉଥିବାରୁ ଅନେକେ ଏହା ବ୍ୟବହାର କରୁଥିବା ଦେଖିବାକୁ ମିଳୁଛି। କେବଳ ଏତିକି ନୁହେଁ, ବର୍ତ୍ତମାନ ମିଳୁଥିବା ସ୍ମାର୍ଟ ଯୋଗ ମ୍ୟାଟ୍ରେ ମୋବାଇଲ୍ ଫୋନ୍ ସହ ବ୍ଳୁଟୁଥ୍ କନେକ୍ଟ ହେବାର ସ୍ପେଶାଲ୍ ଫିଚର ଫିଟ୍ନେସ୍ ମନିଟର କରିବାରେ ବେଶ୍ ସାହାଯ୍ୟ କରୁଛି।
ଥର୍ମୋସ୍ ସ୍ମାର୍ଟ ହାଇଡ୍ରେଶନ୍ ବଟଲ୍: ଏକ୍ସରସାଇଜ୍ ସମୟରେ ଶରୀରର ଜଳୀୟାଂଶ ଠିକ୍ ରହୁଛି ନା ନାହିଁ ଜାଣିବା ଲାଗି ବର୍ତ୍ତମାନ ଅନେକେ ବ୍ୟବହାର କରୁଛନ୍ତି ଥର୍ମୋସ୍ ସ୍ମାର୍ଟ ହାଇଡ୍ରେଶନ୍ ବଟଲ୍। ଏହା ଶରୀରକୁ କେବେ ଏବଂ କେତେ ମାତ୍ରାରେ ପାଣି ଆବଶ୍ୟକ ସୂଚାଇ ଦେବାରେ ସାହାଯ୍ୟ କରିଥାଏ।
ବୋଫ୍ଲେକ୍ସ ଡମ୍ବେଲ୍: ଏହି ଡମ୍ବେଲ୍ ମଧ୍ୟ ଫୋନ୍ ସହ ବ୍ଲୁଟୁଥ୍ରେ କନେକ୍ଟ ହୋଇପାରୁଛି, ଯାହାକି ଫିଟ୍ନେସ୍ ଟ୍ରାକ୍ କରି ମୋବାଇଲ୍କୁ ଡାଟା ପଠାଇଥାଏ। ଏଥିରେ ୫ ପାଉଣ୍ଡରୁ ୬୦ ପାଉଣ୍ଡ ପର୍ଯ୍ୟନ୍ତ ଓଜନର ରିଙ୍ଗ୍ ଲାଗିଛି, ଯାହାକୁ ନିଜର ଆବଶ୍ୟକତା ଅନୁଯାୟୀ ଆଡ୍ଜଷ୍ଟ କରାଯାଇପାରୁଛି। ତେଣୁ ଏହି ସ୍ମାର୍ଟ ଡମ୍ବେଲ୍ ବ୍ୟବହାର କରିବା ଦ୍ୱାରା ଓଜନ ଅନୁଯାୟୀ ପୂର୍ବଭଳି ଆଉ ଅଧିକ ଡମ୍ବେଲ୍ ରଖିବା ଆବଶ୍ୟକ ହେଉନାହିଁ।
