ହଂକଂ,୨୨ା୭(ଏଏଫ୍ପି): ହଂକଂରେ ସରକାର ବିରୋଧୀ ଆନ୍ଦୋଳନ ଥମିବା ନାଁ ଧରୁନାହିଁ। ରବିବାର ହଜାର ହଜାର ଲୋକ ସରକାର ବିରୋଧୀ ସ୍ଲୋଗାନ ଦେଇ ଶୋଭାଯାତ୍ରାରେ ବାହାରିଥିଲେ। ଚାଇନା ଶାସନ ବିରୋଧରେ ବର୍ଷ ବର୍ଷ ଧରି ରହିଥିବା ପୁଞ୍ଜୀଭୂତ ଅସନ୍ତୋଷକୁ ସେମାନେ ପ୍ରକାଶ କରିଛନ୍ତି। ଦୀର୍ଘଦିନ ଧରି ଏହି ଅର୍ଥନୈତିକ କେନ୍ଦ୍ରରେ ଆନ୍ଦୋଳନ ଓ ଉତ୍ତେଜନା ଲାଗି ରହିଛି। ବିଭିନ୍ନ ସମୟରେ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ହିଂସାତ୍ମକ ରୂପ ନେଉଛି। ଏଭଳି ସଙ୍କଟ ନିକଟ ଅତୀତରେ କେବେ ଦେଖାଦେଇ ନ ଥିଲା। ମୁଖ୍ୟ ଭୂଖଣ୍ଡ ଚାଇନାକୁ ପ୍ରତ୍ୟର୍ପଣ ବିଲ୍କୁ ନେଇ ଆନ୍ଦୋଳନର ସୂତ୍ରପାତ ହୋଇଥିତ୍ଲା। ଫଳରେ ସରକାର ଉକ୍ତ ବିଲ୍କୁ ସ୍ଥଗିତ ରଖିଛନ୍ତି। ଏହା ସତ୍ତ୍ୱେ ଆନ୍ଦୋଳନ ଅଧିକ ତୀବ୍ର ହୋଇଛି। ଗଣତାନ୍ତ୍ରିକ ସଂସ୍କାର, ସାର୍ବଜନୀନ ମତାଧିକାର ଏବଂ ଅର୍ଦ୍ଧସ୍ବୟଂଶାସିତ ଅଞ୍ଚଳରେ ହ୍ରାସ ପାଉଥିବା ସ୍ବାଧୀନତାକୁ ରୋକିବା ଆଦି ଦାବି ନେଇ ସ୍ଥାନୀୟ ଲୋକେ ଆନ୍ଦୋଳନକୁ ଆହୁରି ଜୋରଦାର କରିଛନ୍ତି। ଆନ୍ଦୋଳନକାରୀମାନେ ପାର୍ଲାମେଣ୍ଟ ଅଭିମୁଖେ ଅଗ୍ରସର ହେବାରୁ ପୋଲିସକୁ ଲୁହବୁହା ଗ୍ୟାସ୍ ଓ ରବର ବୁଲେଟ ମାଡ଼ କରିବାକୁ ପଡିଥିଲା। ୧୯୯୭ରେ ହଂକଂ ଚାଇନା ପରିଚାଳନାକୁ ଆସିବା ପରଠାରୁ ବେଜିଂ କର୍ତ୍ତୃପକ୍ଷ କେବେ ଏଭଳି ଗୁରୁତର ଚ୍ୟାଲେଞ୍ଜର ସମ୍ମୁଖୀନ ହୋଇ ନ ଥିଲେ।
