ଆଠମଲ୍ଲିକ,୪।୩(ଡି.ଏନ.ଏ.)-୨୦୧୬ରେ ୩ ଶିଶୁପୁତ୍ରଙ୍କୁ କୂଅରେ ଫିଙ୍ଗି କରାଯାଇଥିବା ଏକ ହତ୍ୟା ମାମଲାର ବିଚାର କରି ମଙ୍ଗଳବାର ଅନୁଗୋଳ ଜିଲା ଆଠମଲ୍ଲିକ ଆଡିଶନାଲ୍ ସେସନ୍ ଜଜ୍ ଏସ୍.ଆର୍. ସାମନ୍ତ ଅଭିଯୁକ୍ତା ମା’ ଶୋଭାଙ୍ଗିନୀ ବେହେରାଙ୍କୁ ଦୋଷୀ ସାବ୍ୟସ୍ତ କରିବା ସହ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏଥିସହିତ ୫୦ ହଜାର ଟଙ୍କାର ଜରିମାନା ନିର୍ଦ୍ଦେଶ ଦେଇଛନ୍ତି। ଜରିମାନା ଅନାଦାୟ ସ୍ଥଳେ କୋର୍ଟ ଅଧିକ ୨ ବର୍ଷ ଜେଲ୍ ଦଣ୍ଡାଦେଶ ପ୍ରଦାନ କରିଛନ୍ତି। ଅତିରିକ୍ତ ପିପି ଅସିତ ରଞ୍ଜନ ଦେଓ ଏହି ମାମଲା ପରିଚାଳନା କରିଥିଲେ।
ବିବରଣୀରୁ ପ୍ରକାଶ ଯେ, କିଶୋରନଗର ଥାନା ଗୁରୁଜାଙ୍ଗ ଗ୍ରାମର ବିନୋଦ ବେହେରା ଏକ ଗଞ୍ଜେଇ ମାମଲାରେ ଜେଲ୍ ଯିବା ପରେ ତାଙ୍କ ପରିବାରରେ ଆର୍ଥିକ ସଙ୍କଟ ଦେଖାଦେଇଥିଲା। ଏହାକୁ ନେଇ ସର୍ବଦା କଳହ ହେଉଥିବାରୁ ସ୍ତ୍ରୀ ଶୋଭାଙ୍ଗିନୀଙ୍କ ମାନସିକ ଅଶାନ୍ତି ବଢ଼ିଯାଇଥିଲା। ଏହି କାରଣରୁ ଶୋଭାଙ୍ଗିନୀ ନିଜର ୩ ଶିଶୁପୁତ୍ର ବୃନ୍ଦାବନ ବେହେରା (୪ବର୍ଷ), ରୋହିତ ବେହେରା (ଅଢ଼େଇ ବର୍ଷ) ଓ ରୋହନ ବେହେରା (୮ ମାସ)ଙ୍କୁ ସେପ୍ଟମ୍ବର ୧୦, ୨୦୧୬ ପୂର୍ବାହ୍ନ ୧୦ଟାରେ କୂଅରେ ପକାଇ ମାରିଦେଇଥିଲେ। ଏ ନେଇ ତାଙ୍କ ଶ୍ୱଶୁର ବସନ୍ତ ବେହେରା କିଶୋରନଗର ଥାନାରେ ଅଭିଯୋଗ କରିଥିଲେ। କିଶୋରନଗର ପୋଲିସ ନଂ. ୮୧/୨୦୧୬ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିବା ସହ ସେହିଦିନ ରାତିରେ ବାଦିର ନାଳ ନିକଟରୁ ଅଭିଯୁକ୍ତା ଶୋଭାଙ୍ଗିନୀଙ୍କୁ ଗିରଫ କରିଥିଲା। ପଚରାଉଚରା ବେଳେ ପାରିବାରିକ କଳହ ଓ ମାନସିକ ଅଶାନ୍ତି କାରଣରୁ ଅଭିଯୁକ୍ତା ଏହି ହତ୍ୟାକାଣ୍ଡ ଘଟାଇଥିବା ତତ୍କାଳୀନ ଆଠମଲ୍ଲିକ ଏସ୍ଡିପିଓ ଗୋପାଳକୃଷ୍ଣ ଷଡ଼ଙ୍ଗୀ ସେତେବେଳେ ଗଣମାଧ୍ୟମକୁ ସୂଚନା ଦେଇଥିଲେ। ଏ ନେଇ ପୋଲିସ କୋର୍ଟରେ ଚାର୍ଜସିଟ୍ ଦାଖଲ କରିଥିଲା।
