ଯୋଡ଼ା, ୨୨।୭(ଡି.ଏନ.ଏ.)-କେନ୍ଦୁଝର ଜିଲା ବାମେବାରୀ ଥାନା ଅନ୍ତର୍ଗତ ଜୁରୁଡି କ୍ରେଚ ହଟିଂଠାରେ ପରିବହନ ଜନିତ ଦୁର୍ଘଟଣା ବୃଦ୍ଧି ହେତୁ ରାସ୍ତାରେ ହମ୍ପସ ନିର୍ମାଣ ଦାବି କରି ଜୁରୁଡି କ୍ରେଚ ହଟିଂ ଅଞ୍ଚଳବାସୀ ରାସ୍ତା ଅବରୋଧ କରିଛନ୍ତି। ଘଟଣାସ୍ଥଳରୁ ଜଣାପଡିଛି ଯେ, ରବିବାର ସନ୍ଧ୍ୟା ୫ଟାରେ ଶତାଧିକ ମହିଳା ପୁରୁଷ କ୍ରେଚ ହଟିଂଠାରେ ଏକତ୍ରିତ ହୋଇ ରାସ୍ତାରେ ହମ୍ପସ ନିର୍ମାଣ ଦାବି କରି ରାସ୍ତା ଉପରେ ଧାରଣାରେ ବସିଥିଲେ। କ୍ରେଚ ହଟିଂର ଓ୍ବାର୍ଡ ମେମ୍ବର ସୁମିତ୍ରା ଲାଗୁରୀଙ୍କ ନେତୃତ୍ୱରେ ମହିଳା ଦଶମା ମୁଣ୍ଡା, ଡାଡୁ ମୁଣ୍ଡା ପ୍ରମୁଖ ଅଭିଯୋଗରେ କହିଛନ୍ତି ଯେ, ଶନିବାର ବିଳମ୍ବିତ ରାତିରେ ଏକ ଅଜଣା ଚାରିଚକିଆ ଯାନ ଧକ୍କାରେ ଜରିବାହାଲସ୍ଥିତ ମଧୁ ପାତ୍ର ନାମକ ଜଣେ ବାଇକ ଚାଳକଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା ା ମୃତକଙ୍କ ପରିବାରକୁ କ୍ଷତିପୂରଣ, ପରିବହନ ହେଉଥିବା ଟ୍ରକ, ଡ୍ରମ୍ପର ଗୁଡିକର ଗତି ନିୟନ୍ତ୍ରଣ କରିବା ଏବଂ ପରିବହନ ସଂସ୍ଥା ଗୁଡିକ ପକ୍ଷରୁ ରାସ୍ତାରେ ନିୟୋଜିତ ଥିବା ସୁରକ୍ଷା କର୍ମୀଙ୍କ ଦାୟିତ୍ୱ ଠିକ୍ ଭାବରେ ଚଲାଇବା ଦାବି କରି ରାସ୍ତା ଅବରୋଧ କରାଯାଇଥିଲା। ଏହି ଦାବିଗୁଡିକୁ ପରିବହନ ଠିକାସଂସ୍ଥାଗୁଡିକ ପୁରଣ କରିବା ପାଇଁ ସେମାନେ ଦାବି କରିଥିଲେ ା ପୋଲିସ ପ୍ରଶାସନ ଏ ଦିଗରେ ଦୃଷ୍ଟି ଦେବା ପାଇଁ ଲିଖିତ ଭାବେ ଜଣାଇବେ ବୋଲି ଅବରୋଧକାରୀ ମାନେ କହିଛନ୍ତି। ରାସ୍ତା ଅବରୋଧ ଫଳରେ କ୍ରେଚ ହଟିଂଠାରୁ ବାଂଶପାଣି ପର୍ଯ୍ୟନ୍ତ ଏବଂ କ୍ରେଚ ହଟିଂଠାରୁ ହେଁସାବେଡା ପର୍ଯ୍ୟଶହଶହ ଲୁହାପଥର ବୋଝେଇ ଟ୍ରକ ଓ ଡମ୍ପର ଅଟକି ରହିଥଲା।
