ଲଣ୍ଡନ,୧୩।୧୨(ଏଏଫ୍ପି)- ସ୍ନୁକର କିମ୍ବଦନ୍ତୀ ରୋନି ଓସୁଲିଭାନ ନିଜ ଜାଜ୍ୱଲ୍ୟମୟ କ୍ୟାରିୟରରେ ଏକ ନୂଆ ଅଧ୍ୟାୟ ଆରମ୍ଭ କରିଛନ୍ତି। ସ୍କଟିଶ ଓପନ ଟୁର୍ନାମେଣ୍ଟରେ ଏକ ମ୍ୟାଚ୍ ପୂର୍ବରୁ ସେ ପ୍ରତିଦ୍ୱନ୍ଦ୍ୱୀ ଖେଳାଳି ଓ ରେଫରିଙ୍କ ସହ ହାତ ମିଳାଇବାକୁ ମନା କରି ଚର୍ଚ୍ଚାର କେନ୍ଦ୍ର ବିନ୍ଦୁ ପାଲଟିଛନ୍ତି। ପାରମ୍ପରିକ ଭାବେ ପ୍ରତ୍ୟେକ କ୍ରୀଡ଼ାରେ ମ୍ୟାଚ୍ ଆରମ୍ଭ ହେବା ପୂର୍ବରୁ ଖେଳାଳିମାନେ ପରସ୍ପର ଓ ମ୍ୟାଚ୍ ଅଫିସିଆଲଙ୍କ ସହ ହାତ ମିଳାନ୍ତି। କିନ୍ତୁ ୫ ଥର ବିଶ୍ୱ ଚାମ୍ପିୟନ ଅତ୍ୟଧିକ ସ୍ବାସ୍ଥ୍ୟ ସଚେତନତା କାରଣରୁ ଏପରି କରିବାକୁ ଅନିଚ୍ଛା ପ୍ରକାଶ କରିଥିଲେ। ମୁଁ କୀଟାଣୁ ପ୍ରତି ଅଧିକ ସତର୍କ ରୁହେ। ଏପରି କି କଦାପି କବାଟର ହ୍ୟାଣ୍ଡଲ ଧରେ ନାହିଁ। ଡୋର ହ୍ୟାଣ୍ଡେଲରେ ଟିସୁ ପେପର ବ୍ୟବହାର କରେ ବୋଲି ଜେମ୍ସ କାହିଲଙ୍କୁ ୪-୦ରେ ହରାଇବା ପରେ ଓସୁଲିଭାନ କହିଛନ୍ତି। ଗତବର୍ଷ ବିଶ୍ୱ ଚାମ୍ପିୟନଶିପରେ ଓସୁଲିଭାନଙ୍କୁ ପରାସ୍ତ କରି କାହିଲ ସଭିଙ୍କୁ ଚକିତ କରି ଦେଇଥିଲେ।
